Qorakoʻl: Tangriyevlar xonadoni mirishkorlari tokzordan 70 million soʻmdan oshirib daromadni koʻzlashgan
2025-06-27 13:55:00 / Yangiliklar
Ayni kunda Qorakoʻl tumanida ham qishloq xoʻjaligi ekinlari yetishtirish imkoniyati mavjud boʻlgan 861 gektar bogʻ va tokzor mavjud boʻlib, har yili aholi ehtiyoji uchun oʻnlab tonna sarxil uzum hosili saranjomlanmoqda. Shundan 509 gektar yerda mevazor bogʻ, 352 gektar maydonda uzumzor-tokzor mahsuldorligi oshirilayotgani barobarida, qator orasida sabzavot mahsulotlari ekib, barakali hosil yetishtirib kelinmoqda.
“Doʻrman” mahallasida yashovchi Farhod Tangriyev ham aynan bogʻdorchilikda, tokzor parvarishida mirishkor bogʻbonlardan. Keyingi yillarda u oila aʼzolari bilan birgalikda 1 gektar maydonda barpo qilgan tokzorini obod qilib, uzumning oq kishmishi, toyfi, charos, chillaki kabi navlaridan parvarishlab, har yilgi mavsumda moʻl hosil olishga erishmoqda.
—Uzumchilik bizga ota meros kasb, shu bilan birga serdaromad soha,—deydi Farhod Tangriyev.—Toklar toʻgʻri parvarish qilinsa, hosildorlik yildan-yilga oshib boraveradi. Koʻp yillik, “qari zang”lar oʻrniga oʻsib chiqadigan yosh nihollardan umrbod hosil olish mumkin ekanligini oʻz tajribamizdan koʻrib, guvoh boʻlib turibmiz. Parvarish vaqtidan kechikmasa, agrotexnik tadbirlari toʻla-toʻkis bajarilsa, tok kasallanmaydi.
Shundanmi, oʻtgan yili Tangriyevlar oilasi mirishkorlari bu tokzordan 70 million soʻm atrofida daromadga erishgan. Yana qishki mavsumda biror tonnaga yaqin mayiz tayyorlashga ham muvaffaq boʻlishgan. Shu mehnat orqasidan orzu-havas koʻrib, toʻylar qilingan, yangi zamonaviy avtomashina sotib olinibdi. Albatta, joriy mavsumdagi mehnat va koʻzlanayotgan hosil choʻgʻi bulturgisidan moʻlroq. Muhimi, oila farzandlari ham ota-onasiga mehribon boʻlib, albatta, tomorqada ishlashdan zavq-shavq oladigan, halol mehnat bilan daromad topishga intilib voyaga yetishmoqda.
Uzum hosilini daladan dasturxongacha yetkazadigan pishiqchilik mavsumi dehqon mirishkorlarning peshona teri, zahmati mahsulidir. Shunday ekan, bogʻbonlar hosiliga, xirmoniga baraka yogʻilaversin, dasturxonlarimiz toʻkin-sochin, rizqi nasibamiz moʻl-koʻl boʻlaversin!
Viloyat hokimligi matbuot xizmati