Buxoro viloyati hokimligi

Hududda umumiy qiymati 4 milliard soʻm mablagʻ sarflangani holda oqib oʻtgan ariq oʻzani 5,5 ming metr qismi betonlashtirilgani mahalla aholisining tomorqadan unumli foydalanishi, avvalo roʻzgʻor ehtiyoji uchun sabzavot-poliz mahsulotlari ekib yetishtirishiga zamin yaratdi. 

Ekin yeridan omilkorlik bilan foydalanayotganlardan biri Faxriddin Oʻrinov ham shu mahallada istiqomat qiladi. Bugun u oila aʼzolari bilan birgalikda tomorqasini obod qilib, peshona teri evaziga dasturxon toʻkinligi, rizq-nasibasi butunligiga baholiqudrat hissasini qoʻshmoqda. Ayni kunda Oʻrinovlar tomorqa yerining 8 sotixdan iborat maydonida bulgʻor qalampiri, baqlajon, pomidor niholllari allaqachon hosilga kirgan. Hosil pishib yetilgan shu kunlarda ekin yeridan yigʻib-terib olinayotgan tayyor sabzavot mahsuloti kunora  xaridorlarga, bozorga chiqarib sotilmoqda. Bu mehnatkashlarga bir haftada oʻrtacha 4 million soʻm daromad keltirmoqda.  

— Avvallari tomorqadagi ekinlarni sugʻorishda juda qiynalardik, ekinlarimiz suvsizlikdan qovjirab qurub qolgan paytlar boʻlgan.

Oʻtgan yili ariq qazib tozalanib, oʻzani betonlashtirilgani bizga qulay imkoniyat boʻldi,—deydi Faxriddin Oʻrinov.—Baribir, artizan quduq orqali sugʻorganimiz loyqa, oqava suvdek boʻlmasdi. Mana endilikda sugʻorish bilan bogʻliq muammomiz qolmadi. “Obi hayot” muxayyo qilinayotgani hisobidan tomorqamizni obod qilib, peshma-pesh sabzavot-poliz mahsulotlarini ekib yetishtirib, roʻzgʻorimizni badastir qilib bormoqdamiz. Mehnatimizdan hosil barakali boʻlayotgani, xonadon daromadi oshayotgani turmushimiz yaxshilanayotgani dalolati, albatta.  

Bir soʻz bilan aytganda, keyingi yillarda peshona terini toʻkib, ekin yerini astoydil obod qilib kelayotgan birgina oilaning qishloq xoʻjaligi mahsulotlariga ehtiyoji kam, xohish-istagi esa halol mehnat tufayli roʻyobga chiqmoqda. Shu mashaqqat bilan oila aʼzolari orzu-umidlariga erishmoqdalar. Aynan Oʻrinovlar oilasi misolidagi oddiy haqiqat shuki, intilgan, mehnat qilgan odam uchun baraka — mehnat, sabr va izlanish bilan keladi.

Viloyat hokimligi matbuot xizmati