Buxoro tumani: "Oʻktam Ibrohim toʻqli " fermer xoʻjaligi gʻalla hosildorligini 80 sentnerga yetkazmoqda
2025-06-21 13:30:00 / Yangiliklar
Shu kunlarda gʻallazor maydonlarda jadal borayotgan gʻalla oʻrim-yigʻimida “Mehnat shuhrati” ordeni sohibi, xalq deputatlari tuman Kengashi deputati Ibrohim Toʻqliyev rahbarlik qilib kelayotgan mazkur xoʻjalikda har gektar hosildorligi 80 sentnerga yetkazilayotgani bunda faoliyat yuritayotgan oʻndan ortiq oila mehnatkashlarining salmoqli yutugʻidir.
Ayni kunda xoʻjalik gʻallakor mirishkorlari yalpi xirmoni 210 tonnaga yetkazilgan boʻlsa, bu hosilning yarmi davlat xaridi boʻyicha qabul maskaniga topshirilgan, qolgan bugʻdoy esa qishloq xoʻjaligida katta tajribaga ega fermer Ibrohim Toʻqliyevning tashabbusi bilan xoʻjalik omboridan jamoa aʼzolari—mexanizator va suvchilar, ishchilarga natura shaklida tarqatib berilishi yaxshi anʼanaga aylangan. Qolaversa, atrofdagi Qoʻlba, Yorijon va Rabotak qishloqlaridagi kam taʼminlangan, ehtiyojmand oilalar ham saxovatpesha fermerning himmatidan chetda qolmaydi. Ularga dehqonchilik mahsuloti—somon va bugʻdoy tarqatib berilmoqda.
Bundan tashqari, peshqadam fermer tasarrufidagi 10 gektarda chorva ozuqasi ekib yetishtirilmoqda. Tajribali dehqon 2 gektarda bogʻdorchilikni yoʻlga qoʻyib, jamoasi moddiy manfaatdorligini ham muttasil oshirib kelmoqda.
Ayni kunda xoʻjalik mirishkorlari baravj rivojlanayotgan gʻoʻza maydonlarida agrotexnik tadbirlarga eʼtibor qaratishgan. Har yili agrotexnik tadbirlarni innovatsion uslubda tashkil etishga xayrihoh boʻlgan fermer paxta va gʻallachilikda xorijiy istiqbolli navlarni ham tajriba-sinov tariqasida ekib yetishtirmoqda. Maqsad har yilgi anʼanaga muvofiq, joriy yil dehqonchilik mavsumini yuqori kayfiyatda, mehnat muvaffaqiyati bilan yakunlash, barakali xirmon barpo qilishdir.
Viloyat hokimligi matbuot xizmati