Buxoro viloyati hokimligi

Chekka tumanda tomorqa yeridan unumli foydalanayotgan, qishda ham issiqxona barpo etib, sarxil oziq-ovqat mahsulotlari parvarishlab, roʻzgʻor kam-koʻstini toʻldirayotgan mirishkor xonadonlarga havas qilasan, kishi. Bugunga kelib chekka tuman aholisining 7 ming gektarga yaqin maydonda tomorqa yeri  mavjud boʻlib, bu yerdan oqilona foydalanib, yaxshi daromad olayotgan oilalar turmush tarzini yaxshilamoqda. 

Mahalladagi mehnatkash xonadonlardan biri Husniddin Muhammedov ham bugun tomorqasini yashnatib, roʻzgʻorga zarur sabzavot-poliz mahsulotlarini ekib yetishtirib, qishki mavsumda ham issiqxona barpo qilib, moʻmay daromad olayotganlardan. Hozirda tomorqasida pomidorning “cherri” navini yetishtirayotgan oila sohibi oʻtgan yili tomorqasida yetishtirgan pomidordan 40 million soʻmga yetkazib daromad olgan. Mirishkor dehqon bu yil oilasi aʼzolari bilan birgalikda issiqxona yeridan moddiy manfaatdorlikni 60 million soʻmga yetkazish harakatida.  

—Yilda kamida ikki marta ekin yerini tayyorlab, pomidor yetishtirishga odatlanganmiz, bu borada bizga issiqxona mehnati juda manzur,—deydi Husniddin Muhammedov.—Issiqxona daromad manbai ham. Baʼzan 10 sotixli yerdan qoʻlga kiritolmagan moʻmay foydani atigi 2-3 sotixdan iborat issiqxonadan bemalol topish mumkin. Oila aʼzolarimiz bilan mana, 5-6 yildirki, yerdan yaxshigina daromad olib kelmoqdamiz. Aslida, tomorqa rizq-roʻz, qoʻshimcha daromad manbai, bandlikni, arzonchilikni taʼminlashning samarali yoʻli, muhimi bir joyda toʻxtab qolmaslikdir.

Shubhasiz, dehqonchilikda katta tajriba orttirgan xonadonda dasturxon toʻkinligi ham risoladagidek. Bir tomonda hovlini oʻrab turgan dov-daraxtlar va tokzordan ham ayni pishiqchilik mavsumida yetarlicha sarxil meva, uzumdan moʻl hosil olinayotgani tahsinga loyiq. Halol mehnatdan kelayotgan daromad oila orzu-havasiga, farzandlar taʼlim-tarbiyasiga, roʻzgʻor badastirligiga sarflanmoqda.

Viloyat hokimligi matbuot xizmati