Buxoro viloyati hokimligi

Tashrifning bu galgi manzili Guanchjouga provinsiyasi Shenchjen shahri boʻldi. 

Qayd etish lozimki, Shenchjen nafaqat provinsiyaning, balki Xitoyning yirik ishlab chiqarish, savdo va sanoat rivojlangan mintaqalaridan biri hisoblanadi. Ayniqsa, bu yerda mebelsozlik sanoati keng taraqqiy etgan. 

Delegatsiya aʼzolari dastlab hududdagi mebelsozlikka ixtisoslashgan kompaniyalar tomonidan ishlab chiqarilgan oʻnlab turdagi mahsulotlar bilan tanishtirildi. 

Shundan soʻng Botir Zaripovning Guandun provinsiyasi yashil energetika qoʻmitasining Markaziy Osiyo mintaqasi rahbari William Lin bilan tor doirasidagi uchrashuvi boʻlib oʻtdi.
 
Muloqotda  dastlab Shenchjendagi mebelsozlik korxonalari haqida batafsil maʼlumot berildi. Shundan soʻng oʻzaro hamkorlikda amalga oshiriladigan ishlar yuzasidan fikr almashildi. Xususan, Shenchjen tajribasi asosida Jondor tumanida mebelsozlikni yanada rivojlantirish va aholini kambagʻallikdan chiqarishda masalalari koʻrib chiqildi.  
 
Shu kuni “Buxoro-Shenchjen” iqtisodiy va savdo forumi oʻtkazildi. Forumda viloyat hokimi Botir Zaripov soʻzga chiqib, ikki mamlakat oʻrtasida savdo-iqtisodiy, sarmoyaviy, taʼlim, madaniy-gumanitar hamkorlik strategik sheriklik darajasiga koʻtarilganini, bunda ikki davlat rahbarlarining oʻzaro tashriflari va uchrashuvlari muhim oʻrin tutayotganini eʼtirof etdi. Shu asosda Buxoroda ham Xitoy kapitali ishtirokidagi korxonalari soni ortib borayotgani, mazkur forum esa yangi hamkorlik topish uchun maydon vazifasini oʻtashini alohida qayd etdi. Hamda investorlarni Oʻzbekistonda yaratilgan shart-sharoit va imkoniyatlardan foydalanib, ikki tomonlama manfaatli loyihalarni amalga oshirishga taklif qildi. 

Forum doirasida Shenchjen ishbilarmon doira vakillarining taqdimotlari oʻtkazildi. 

Forum yakunida Jondor tumani va qator kompaniyalar oʻrtasida mebelsozlikni rivojlantirish boʻyicha kelishuvlar imzolandi. 

Viloyat hokimligi matbuot xizmati