Buxoro viloyati hokimligi

Yosh sportsevarlarning sevimli maskaniga aylanayotgan inshootning tantanali ochilishida viloyat prokurori, Oʻzbekiston sport kurashlari assotsiatsiyasi Buxoro viloyati boʻlimi rahbari Ulugʻbek Xamdamov, Kogon tuman hokimi Otabek Qazoqov, viloyat sport boshqarmasi boshligʻi Oʻtkir Nadjimidinov, shuningdek, faxriy murabbiylar va ular shogirdlari hozir boʻldilar. 

Zamonaviy koʻrinish olgan sport zalini foydalanishga topshirish marosimida ramziy alvon lenta qirqilib, yigʻilganlar unda sportsevarlar uchun yaratilgan shart-sharoit, inventarlar bilan yaqindan tanishdilar. Tadbirda soʻz olganlar mazkur sport majmuasi yoshlarga har tomonlama qulay imkoniyat ekanligini taʼkidlab, bu maskandan kelgusida mamlakat, Osiyo va jahon miqyosidagi chempion sportchilar yetishib chiqishiga ishonch bildirdilar.

Quvonarlisi, zamonaviy sport zaliga ega boʻlgan kuni nurafshonliklar  “Yangi Oʻzbekiston – Olimpiya choʻqqilari” deb nomlangan sport musobaqasining mintaqaviy bosqichiga ham mezbonlik qildilar. Murosasiz kechgan bahslarda Kogon shahri va tumani, Qorovulbozor tumanidan kelgan ellikdan oshiq yosh sportchi oʻz mahoratlarini sinovdan oʻtkazdilar. Musobaqa yakunida gʻolib va sovrindorlar tashkilotchilar, hayʼat aʼzolari tomonidan medal, diplom hamda esdalik sovgʻalari bilan taqdirlandilar.

Viloyat hokimligi matbuot xizmati