Buxoro viloyati hokimligi

Viloyat hokimligi boshqaruv apparati masʼul xodimlari, tegishli idora va tashkilotlar vakillari, online studiyalardan shahar va tumanlar hokimlarining oʻrinbosarlari, davlat fuqarolik xizmati xodimlari ishtirok etgan muloqotni viloyat hokimligi tashkiliy-kadrlar guruhi rahbari Izzatullo Mahmudov olib bordi. 

Taʼkidlanganidek, davlat xizmati mamlakat ravnaqiga xizmat qiladigan, xalq bilan hukumatning uzviyligini bogʻlaydigan muhim rishta va astoydil mehnat qilishni taqozo etadigan sharafli va shu bilan birga masʼuliyatli vazifa. Davlat organlarida yoki boshqa tashkilotlarda mehnat shartnomasi asosida yoxud saylab qoʻyiladigan, tayinlanadigan lavozimlarda mehnat faoliyatini amalga oshirayotgan boshqaruv xodimi. Davlat xizmatchisi oʻz faoliyatida yuqori malakaga ega boʻlib, xolislik, prinsipiallik, haqqoniylik, insonparvarlik tamoyillariga qatʼiy rioya etishi, turli illatlardan xoli boʻlishi, korrupsiya va manfaatlar toʻynashuviga yoʻl qoʻymasligi taqozo qilinadi. Zero, davlatimiz rahbari taʼbiri bilan aytganda, “Betakror yurtimizga, oljanob xalqimizga sadoqat bilan xizmat qilish barchamizning sharafli burchimizdir!”. 

Shu nuqtayi nazardan, viloyat hokimining oʻrinbosari Aziz Qalandarovning maʼruzasi diniy radikalizmga qarshi kurash chora-tadbirlari va bu jarayonda davlat xizmatchisining oʻrni hamda vazifalari xususida boʻldi. 

Mamlakat va millatimiz, Vatanning, yurtning rivojiga hissa qoʻshishimiz, yot gʻoyalar taʼsiriga berilmaslik, ayniqsa internet va ijtimoiy tarmoqlar imkoniyatidan oqilona foydalanish, unda ayrim dinni niqob qilib olgan kimsalar tomonidan targʻib etilayotgan mazhabsizlik, radikalizm va boshqa ekstremistik gʻoyalardan oʻzimizni va farzandlarimizni himoyalash, bir soʻz bilan aytganda, diniy ilmlar bilan birga albatta dunyoviy ilmlarni egallashimiz, ilm-fanga yaqin boʻlishimiz, farzandlarimizni xalq xoʻjaligi tarmoqlari mutaxassislari sifatida oʻqitib, kasb-korli qilish, hayotda oʻz oʻrinlarini topishlariga koʻmaklashish ham qarz, ham farz ekanligi taʼkidlandi. 

Shuningdek, muloqotda qatnashgan viloyat adliya boshqarmasi boshligʻining birinchi oʻrinbosari Sherzod Baxronov davlat fuqarolik xizmatchilari zimmasidagi dolzarb vazifalar, bu borada mamlakatimizda korrupsiya va manfaatlar toʻnashuviga doir qabul qilingan Qonunlar mazmun-mohiyati haqida maʼruza qildi. Qayd qilinganidek, davlat xizmatida korrupsiya, taʼmagirlik, manfaatlar toʻqnashuvi bilan bogʻliq munosabatlarni tartibga solishning asosiy prinsiplari qonuniylikni, fuqarolarning, tashkilotlar, jamiyat va davlatning qonuniy manfaatlari ustuvorligini taʼminlash, ochiqlik va shaffoflik, xolislik, korrupsiyaga nisbatan murosasizlikni namoyon etishda yaqqol ifodalanadi. 

Diniy radikalizm, ekstremizm, shuningdek, korrupsiya va manfaatlar toʻqnashuvi mavzulariga bagʻishlangan dolzarb muloqotda yigʻilganlar oʻzlarini qiziqtirgan savollarga atroflicha javob oldilar. 

Viloyat hokimligi matbuot xizmati