Buxoro viloyati hokimligi

Tahlillardan koʻrinishicha, tumanda 2025-yil mavsumida qishloq xoʻjaligida band 337 ta fermer xoʻjaligi tomonidan 6 ming 661 gektar gʻalla maydonidan rejada belgilangan 19 ming 867 tonna oʻrniga, 20 ming tonnadan ortiq sifatli don ishlab chiqarish maqsad qilingan. Bu jarayonda yuqori darajada tashkil qilingan oʻrim-yigʻim mavsumi yakuniga borib har bir gektar hosildorligini 70 sentnerdan oshirish imkoniyati yaratilgan.   

Ayni kecha-kunduzda mashaqqat bilan yetishtirilgan hosilni nest-nobud qilmay, qisqa muddatda oʻrib-yigʻib olish maqsadida 27 ta gʻalla oʻrish kombayni kuchidan foydalanilmoqda. Bobo-dehqonning peshona teri evaziga yetishtirilgan hosil choʻgʻi yomon emas. Oʻrimning dastlabki haftasida har gektar yerdan oʻrtacha 55 sentnerdan hosil koʻtarildi.

— Mavsumni uyushqoqlik bilan oʻtkazish maqsadida har bir yuqori unumdor kombayn bilan kuniga oʻrtacha 5-10 gektar atrofidagi gʻallazor hosilini oʻrib-yigʻib olish choralarpi koʻrilmoqda,—deydi tuman hokimining qishloq xoʻjaligi boʻyicha oʻrinbosari Ozodbek Noʻkarov.—Gʻalla oʻrim mavsumi uchun ishchi guruhi tashkil etilgan boʻlib, oʻrim-yigʻimda ishtirok etayotganlarga dalaning oʻzida issiq ovqat, zarur mehnat sharoiti, koʻchma texnik xizmat koʻrsatish mobil guruhlari shay qilingan. Gʻalla oʻrish kombaynlari bir maromda, uzluksiz ishlashini taʼminlash uchun yoqilgʻi moylash materiallari va boshqa zaruriy asbob-uskunalar shay qilingan.

Tumanda davlatga gʻalla sotish shartnomaviy topshirigʻini oshirib bajarayotgan xoʻjaliklar soni kundan-kunga koʻpaymoqda.

Jumladan, "Azizbek-Eʼzozbek zamini” fermer xoʻjaligi moʻljaldagi 46 tonna oʻrniga 57 tonna, "Oʻrinoy Mirzayeva" fermer xoʻjaligi rejadagi 66 tonna oʻrniga 72 tonna gʻallani davlat qabul maskaniga yetkazib berib, belgilangan rejani oshigʻi bilan bajarishdi. Ammo hali bu xoʻjaliklar ixtiyorida hosili oʻrilmagan gektarlar bor. Bundan koʻrinadiki, dalada jamoa mehnatkashlari moddiy manfaatdorligini yanada oshirish imkoniyati mavjud. 

Viloyat hokimligi matbuot xizmati