Buxoro viloyati hokimligi

Kuni kecha Kogon tumanida “Mustaqillik” mahalla markazi binosi foydalanishga topshirilgani mahalla maʼmuriyati hamda hudud aholisi uchun chinakam sovgʻa boʻldi. Mahalla binosining tantanali ochilish marosimida tuman hokimi Otabek Qazoqov boshchiligidagi masʼullar, jamoatchilik vakillari, mahalla faollari, mehna faxriylari ishtirok etdilar. 

“Mustaqillik” mahalla markazi binosi Oʻzbekiston Respublikasi Prezidentining 2021-yil 18-sentyabrdagi “Islom taraqqiyot banki va OPEK xalqaro taraqqiyot jamgʻarmasi ishtirokida qishloq joylarni barqaror rivojlantirish loyihasini amalga oshirish chora-tadbirlari toʻgʻrisida”gi qaroriga asosan bunyod qilingan. Bunda umumiy qiymati 4 milliard 628 million soʻm mablagʻ moliyalashtirilgan boʻlib, 13 sotixdan iborat yer maydonida amalga oshirilgan qurilish ishlarida mahalliy pudratchi "Amirshoh mohir quruvchi" MCHJ binokorlari jonbozlik koʻrsatdilar. 

Zamonaviy andozadagi mazkur uch qavatli inshoot ochilishida soʻzga chiqqanlar hudud aholisini zamonaviy qiyofadagi, koʻrkam mahalla binosi bilan muborakbod etib, soʻnggi yillarda mamlakatimizda mahalla instituti faoliyatini yanada rivojlantirish, uni xalqchil tuzilmaga aylantirish borasida qator ishlar amalga oshirilayotganini alohida taʼkidladilar. 

Yangi qurilgan mahalla maʼmuriy markazi binosida uning raisi, hokim yordamchisi, yoshlar yetakchisi, xotin-qizlar faoli hamda profilaktika inspektori uchun alohida xonalar mavjud boʻlib, ularning har biri zamonaviy moddiy-texnika vositalari va mebel jihozlari bilan taʼminlangan. 

Xususan, mazkur koʻrkam bino yertoʻla qismidan iborat boʻlib, yerosti qavatida meva-sabzavotlarni saralash va qadoqlash uchun maxsus joy, yordamchi xonalar, birinchi qavatda esa ayollar va erkaklar uchun alohida sartaroshxona, qandolat sexi va savdo doʻkoni, ikkinchi qavati asosan oʻquv markazlariga ajratilgan boʻlib, unda kasb-hunarga yoʻnaltirish oʻquv markazi, fitnes zali zarur inventarlar bilan jihozlangan.Uchinchi qavatda asosan yoshlar bilan gavjum boʻlishi uchun tikuv sexi, maishiy texnika ustaxonasi faoliyatini yoʻlga qoʻyilmoqda.  

Viloyat hokimligi matbuot xizmati