Buxoro viloyati hokimligi

Shu nuqtayi nazardan, “Buxoro agroklaster” paxta-toʻqimachilik klasterining madaniy-maʼrifiy tadbirlar oʻtkazish, xalq havaskorlik jamoalari uchun munosib sharoit yaratish, aholining boʻsh vaqtini mazmunli tashkil etish, yoshlarning amaliy va tasviriy sanʼatda oʻz mahoratini oshirishi uchun qulaylik hozirlash maqsadida madaniyat markazi qurish tashabbusi qoʻllab-quvvatlangandi. 

Madaniyat markazi uchun Gʻijduvon tumani markazidagi “Chorsu” mahalla fuqarolar yigʻini hududidan qariyb bir gektar yer maydoni ajratilgan boʻlib, uning yarim gektarli qismida loyihaga binoan ikki qavatli inshoot qurilishi yakuniga yetkazilmoqda. Loyihaga koʻra, markaz kinoteatr va tomosha zallari, musiqa va sanʼat toʻgaraklari xonalari, badiiy havaskorlik jamoalari uchun alohida jihozlanadigan xonalar, qolaversa, oshxona va bufetdan iborat boʻladi.

Xuddi shunday, muassasada musiqa va sanʼatga oshufta barkamol avlod uchun markazda anʼanaviy xonandalik, raqs, drama, anʼanaviy cholgʻu asboblari, doyrachilar toʻgaraklari faoliyati yoʻlga qoʻyiladi. 

Tez orada foydalanishga topshirilishi maqsad qilingan madaniyat markazi 200 nafardan ziyod gʻijduvonlik yosh isteʼdod sohibini oʻz bagʻriga olishi kutilmoqda. Maskanni homiylik mablagʻi asosida talab darajasida jihozlash, zarur inventarlar, qattiq va yumshoq mebel bilan taʼminlash ham diqqat-eʼtiborda. 

Eʼtiborlisi, bu muassasa ishga tushirilgach, unda 30 nafarga yaqin ijodiy xodim, pedagog yosh avlod taʼlim-tarbiyasiga jalb qilinadi. 
Bugun viloyat hokimi Botir Zaripov mazkur obyektda boʻlib, amalga oshirilgan ishlarni koʻzdan kechirdi. Markazni mazmun jihatdan boyitish yuzasidan oʻzining taklif va tavsiyalarini berdi.

Viloyat  hokimligi matbuot xizmati