Buxoro viloyati hokimligi

Bugunga kelib tuman mehnatkash pillakorlarining sermashaqqat faoliyati oʻz samarasini berib, pillakorlar har bir qutidan 60 kilogramm oʻrniga oʻrtacha 68-75 kilogramdan yuqori sifatli “kumush tola” yetishtirayotganliklari muvaffaqiyat omili boʻlmoqda. Pilla qabul qilish maskanida esa rejadan oshiqcha topshirilgan har kilogram hosil uchun tarozi oldida 50 ming soʻmdan mukofot puli berilayotgani “kumush tola” parvarishiga boʻlgan qiziqish va ragʻbatni oshirmoqda.  

Bu yil bahorgi mavsumda tuman inkubatoriyalarida jonlantirilgan ipak qurti oʻtgan yilgisidan 293 qutiga koʻproq, yaʼni 4 ming 368 qutini tashkil etmoqda.  Yetishtirilayotgan pilla salmogʻi esa bulturgisidan 17,7 tonnaga koʻproq, aniqrogʻi, 270 tonnadan salmoqliroq koʻrinish olmoqda. Garchi bir oydan oshiqroq mavsum boʻlsada, ipak qurti parvarishi, pilla yetishtirishning oʻzi bir mashaqqat. Shunga qaramasdan, mehnatu mashaqqatni zimmasiga olgan mirishkorlar tomonidan ayni kunda tumanning “Navbahor” MFY dagi pilla qabul qilish punkti har qachongidan gavjum koʻrinish olmoqda. 

Albatta, bahorgi mavsumda 270 tonnadan moʻl hosil xirmonini yaratish romitanlik mirishkor pillaboqarlar uchun chakana mehnat emas. Hududdagi fermer, dehqon xoʻjaliklari, ular tarkibidagi oilaviy zvenolar va kasanachilar uchun “gʻalvir suvdan koʻtariladigan” palla. Kuni kecha tuman hokimi Umidjon Barnoyev ham pilla qabul maskanida boʻlib, birinchilar qatorida “kumush tola” xirmoniga hosil qoʻshayotgan ilgʻorlarni qutlab, mehnatkashlarga esdalik sovgʻalarini topshirdi.

Ana shunday mehnatkash oilaviy zvenolardan birining egasi Attaron mahallasida yashovchi tajribali pillakor Qumri Rajabovadir. Joriy mavsumda bu xonadon ahli 2 quti ipak qurti parvarishlab, bundan 150 kilogramga yetkazib “kumush tola” yetishtirishni maqsad qilishgan. Hosil choʻgʻini chamalagan mehnatkash oila aʼzolarining kayfiyatlari aʼlo. Hademay ular bir oylik mehnat mahsuli—12 million soʻm atrofida daromad qilishga yaqin turishibdi. 

Viloyat hokimligi matbuot xizmati