Buxoro viloyati hokimligi

Bu borada Oʻzbekiston Respublikasi Prezidentining 2017-yil 29-martdagi “Oʻzbekipaksanoat” uyushmasi faoliyatini tashkil etish chora-tadbirlari toʻgʻrisida”gi qarori dasturilamal vazifasini oʻtamoqda. Qarorga muvofiq ipak qurti parvarishlab pilla yetishtirilgan davr tizim kasanachilari uchun yillik ish staji boʻlib qoʻshilmoqda va bu pensiya tayinlashda alohida hisoblanmoqda.

Koʻp tarmoqli agrosanoat majmuasining pilla yetishtirish tarmogʻida birgina tumanda ayni kunda 4 mingdan ortiq kasanachi va oilaviy zveno, shuningdek, hududdagi 300 taga yaqin fermer xoʻjaligi aʼzolarining bandligini koʻrish mumkin. Qamrov oʻsib borayotgani hisobidan “kumush tola” salmogʻi ham yuksalmoqda. Qiyosan olganda, 2022-yilda tuman pillakorlari tomonidan 256 tonnadan ziyod sanoat uchun qimmatbaho xom ashyo yetishtirilgan boʻlsa, oʻtgan 2024-yil bahor mavsumida qorakoʻllik pillakorlar 5 322 quti ipak qurti parvarishlab, shundan yakunda 343 tonnaga yetkazib pilla xirmonini barpo etishga muvaffaq boʻldilar. 

Koʻrinib turibdiki, “kumush tola” xirmoni ikki yil burungisidan 86 tonnaga salmoqliroq. Bunda har qutidan olinayotgan hosil salmogʻi oʻrtacha 65 kilogramga yetayotgan boʻlsa, hududda ipak qurti boqib, moddiy manfaat koʻrish istagida boʻlgan xonadon safi ham kengaymoqda. Buning uchun uzoq yillardan beri pillachilikda yuqori hosildorlikka erishib kelayotgan 4325 ta kasanachi va oilaviy zveno bilan toʻgʻridan-toʻgʻri shartnomalar tuzilgan.

Romitan tumanida faoliyat yuritayotgan "Romstar" pillani qayta ishlash korxonasida Qorakoʻl, Olot, Jondor, Romitan tumanlaridagi 11 mingdan ortiq kasanachi va oilaviy zvenolar tomonidan yetishtirilgan pilla qabul qilinib, ipak kalavalarga aylantiriladi. Oʻtgan yillarda ipak tola Eron, Xitoy, Vyetnam, Rossiya kabi davlatlarga eksport qilingan. 

Joriy mavsumda ham chekka tumanda ipak qurti boquvchilarga joriy mavsum oldidan buyurtmachi va taʼminotchi tomoni "Romstar" MCHJ tomonidan har quti ipak qurti uchun 500 ming soʻm avans–boʻnak puli tarqatilib, hosil qabul qilishda rejadan ortiqcha har kilogram pilla uchun tarozi boshida 50 ming soʻmdan pul berilayotgani oilaviy zvenolar mehnatiga munosib ragʻbatdir.

Shu kunlarda tuman pilla qabul maskanida ish qizgʻin. Bir oy mashaqqat chekib qilingan mehnat mahsuli “kumush tola” xirmoni yuksalmoqda. Har yilgi anʼanaga koʻra, dehqonchilik mavsumining ilk hosili – “kumush tola” qabuliga jadal kirishilgan. Tuman hokimi Xurshid Tohirov bu yerdagi pillakor kasanachilar, peshqadam oilaviy zvenolar jamoalarini erishayotgan yutuqlari bilan qutlab, hosilga baraka tiladi. Ilgʻor pillakorlar esdalik sovgʻalari va oshirib bajarilgan har kilogram uchun tarozi boshida mukofot pullarini qabul qilmoqdalar.  

Viloyat hokimligi matbuot xizmati