Qorakoʻl: Normatovlar uy xoʻjaligida qoramol soni 15 boshdan oshirildi
2025-05-13 11:20:00 / Yangiliklar
— Mol boqqan oila hech qachon kam boʻlmagan. Yoshligimizdan chorvachilikka mehrimiz tushib, uyda zotdor qoramol parvarishiga bor kuch-gʻayratimizni bermoqdamiz,—deydi Hamroqul Normatov.—Oxirgi 5 yilda bu ishga astoydil kirishib, qoramol sonini 15 boshga yetkazdik. Shulardan yarmini sogʻin sigirlar tashkil etmoqda. Ayni paytda ularni har biridan kuniga oʻrtacha 10-12 litr sut sogʻib olinmoqda. Sutni qishlogʻimizdagi bolalar bogʻchasiga yetkazib, qoʻshimcha daromad orttirayotgan boʻlsak, ogʻilxonamizdagi 20 boshdan ziyod nasldor qoʻylar parvarishini ham talab darajasida olib borib, ular kunlik ozuqa ratsioniga qatiy amal qilmoqdamiz. Bu ishdan qoʻlga kiritayotgan yillik sof daromadimiz esa 80-90 million soʻmni tashkil etmoqda.
Tumanda chorvachilik tarmogʻini kengaytirish, zotdor qoramol tuyogʻini koʻpaytirish va mahsuldorlikni oshirish xususida gap borganda, “Barhayot Muhammad Rajab parranda”, “Yoʻldosh Zuhro koʻhinur” kabi fermer xoʻjaliklari faoliyati eʼtiborga loyiq. Ular har birida oʻtgan yillarda xorijdan, Boltiqboʻyi respublikalaridan 300 boshdan “angust”, “abrikos”, “smental”, “golshteyn” zotlariga mansub naslli qoramollar sotib olib keltirilib, veterinariya talablari asosida boqilmoqda.
Shuningdek, peshqadam subyektlardan biri “Megacluster” MCHJda chorva mollari uchun yangicha usulda, yaʼni tarkibida dagʻal xashak, beda, yantoq, shiraga kon chorva ozuqasi, kunjara, uch xil turdagi don mahsulotlari, chigit shroti va boshqa koʻshimchalardan iborat, granula koʻrinishidagi omuxta yem ishlab chiqarishi yoʻlga qoʻyilgani ham hududda fermer xoʻjaliklari bilan birga aholi xonadonlarida chorvachilik tarmogʻini rivojlantirish imkonini bermoqda.
Bugun tashabbus koʻrsatib, aniq hisob-kitoblarga tayanib ish boshlash, balki ayni xorijiy tajriba asosida omilkorlik bilan chora koʻrish, mahalliy sharoitga mos chorva mollarini tanlash, ular parvarishini reja asosida olib borish taqozo qilinadi. Zero, chorvachilik, boʻrdoqichilik yoʻnalishlarida aholi talablaridan kelib chiqib, aynan daromadli tarmoq—goʻsht va sut mahsulotlari yetishtirishga qiziqish kuchaymoqda.
Viloyat hokimligi matbuot xizmati