Olot: tomorqachilikda Hayitgul Saidova koʻplarga oʻrnak boʻlmoqda
2025-05-10 16:30:00 / Yangiliklar
Shu mahallada umrguzaronlik qilayotgan Hayitgul Saidovaning ham tomorqa yeridan unumli foydalanib, qishloqdoshlariga namuna boʻlayotgani eʼtirofga loyiq. Xonadon bekasi besh farzandni voyaga yetkazayotgan mehribon ona. Tayinki, serfarzand oilada mavjud imkoniyatdan samarali foydalanishga harakat qilinmoqda. Avvalo, tomorqa bu oila roʻzgʻori kundalik ehtiyojlarini qondirishda juda asqotmoqda.
Xonadon mirishkorlari mavjud 25 sotixdan iborat hovli-joyning 10 sotixli ekin yerini yashnatish bilan birga, undagi qoʻshimcha imkoniyat sifatida baliqchilikni yoʻlga qoʻyib, tovuq, qoramol, qoʻy-echki boqish barobarida har yilgi anʼanaga muvofiq, ipak qurti ham parvarishlashni kanda qilishmaydi. Bultur Saidovalar oila aʼzolari 2 quti ipak qurtidan 150 kilogramga yetkazib “kumush tola” yetishtirib, qoʻshimcha daromadga erishgan boʻlsalar, bu yil ham xuddi shuncha ipak qurti boqib, barakali pilla yetishtirib, 15 million soʻmdan ziyod moddiy manfaatni qoʻlga kiritish harakatidalar.
—Oʻtgan yili hovuzimizga chavoq tashlab, yetishtirgan oʻrtacha 1,3 tonnaga yaqin “luqmai halol”dan 30 million soʻmdan ortiq daromad olganmiz,—deydi Hayitgul Saidova.—Shuningdek, baliq boqilayotgan hovuz yonidan tovuqxona qurib, hozirda undagi parranda sonini 100 boshga yetkazishga yaqinmiz. Har kuni nevaram bilan birga bu tovuq katagidan 60 tadan koʻproq tuxum olamiz. Bundan qoʻni-qoʻshniga ham sotib, qoʻshimcha daromadga ega boʻlmoqdamiz.
Shu tariqa, halol peshona teri ortidan bir oila dasturxoni baliq, tuxum, parhezbop goʻsht, qolaversa, sut, sariyoqqa, boshqacha aytganda, tabiiy toza ekologik oqsilga qondirilmoqda. Hayitgul Saidova xonadonida tovuslar ham boqishni boshlaganiga ancha boʻlgan. Bu nafaqat koʻzni quvontiradigan goʻzallik, balki bolalar uchun tabiatga muhabbat uygʻotuvchi muhim vosita hamdir.
Viloyat hokimligi matbuot xizmati