Buxoro viloyati hokimligi

Bu oʻrinda gap Toshkent shahridagi Milliy matbuot markazida Oʻzbekiston jurnalistlar uyushmasi bilan hamkorlikda “Qanot” loyihasi doirasida tashkil qilingan buxorolik yosh yozuvchi va jurnalist Obid Qoʻldoshning “Unutilgan ashula” kitobi taqdimoti xususida bormoqda. 

Ayni bahor 40 yoshni qarshilayotgan isteʼdolli jurnalist turli yillarda “Jondor ovozi”, “Buxoro oqshomi” gazetalarida muxbir, “Maʼnaviyat sarchashmasi”, “Ezgulik” gazetalarida muharrir boʻlib ishlagan. Soʻnggi yillarda respublika va mahalliy nashrlarda oʻzining faol ijodiy chiqishlari bilan oʻquvchilar eʼtiboriga tushgan yosh iqtidor egasi Jurnalistlar uyushmasining Buxoro viloyati boʻlimi mutaxassisi sifatida mehnat qilib, oʻz kasbiy mahoratini muttasil oshirib bormoqda.  

Badiiy ijodga oshuftalikning koʻp yillik mahsuli sifatida Obid Qoʻldoshning hozirga qadar “Xayolimni oʻgʻirlagan qiz”, “Mohiyatga sayr”, “Forggeton song” (ingliz tilida) singari kitoblari nashr etilgan. Hikoyalari turk, ozar, qirgʻiz, ingliz va rus tillariga tarjima qilingan. U Oʻzbekiston bahori respublika festivali (2019) nasr yoʻnalishi gʻolibi hamdir.

“Unutilgan ashula” kitobi taqdimotiga qaytsak, tadbirni Oʻzbekiston Jurnalistlar uyushmasi raisi vazifasini bajaruvchi Xolmurod Salimov olib borib, soʻnggi yillarda mamlakatimiz Prezidenti Shavkat Mirziyoyev rahnamoligida yoshlarning kitobxonlik madaniyatini yuksaltirish, ijod muhitini rivojlantirish borasida amalga oshirilayotgan ishlarga toʻxtaldi. Jumladan, u mazkur kitob mazmun-mohiyatiga doir oʻz fikr-mulohazalarini bildirdi. 

—Bu kabi yangi loyihalar targʻiboti orqali ikki maqsad-muddaoni koʻzlaganmiz,—dedi Oʻzbekiston jurnalistlar uyushmasi raisi Xolmurod Salimov.—Birinchidan, Jurnalistlar uyushmasining respublikamiz barcha hududlarida faoliyat koʻrsatayotgan aʼzolari ijodini ichki resurslarimiz va homiylarni jalb etgan holda munosib ragʻbatlantirishga katta eʼtibor va koʻmakni tizimli asosda kuchaytirmoqdamiz.  

Ikkinchidan, ayni kunda Davlatimiz rahbari tomonidan yoshlarning kitobxonlik madaniyatini oshirish, ularni ilm olishga chorlash, tafakkur olami va dunyoqarashini yuksaltirish yoʻlidagi keng koʻlamli maʼnaviy-maʼrifiy targʻibot ishlariga munosib hissa qoʻshish maqsad qilingan.  

Tadbirda yurtimizning isteʼdodli shoir va yozuvchilari, taniqli jurnalistlar Shuhrat Jabborov, Amirqul Karim, Muhabbat Yuldasheva, Zikrilla Neʼmat, Dilshod Rajab, Nasrullo Ergash, Ilyos Eshmurodov, Ruxsora Nurlar soʻzga chiqishib,  yangi chop etilgan kitobning ahamiyati, mazmun-mundarijasi, muallifning samarali ijod va hayot yoʻli, fazilatlari haqida batafsil fikr-mulohazalarini bayon etdilar.
Tadbir yakunida “Qanot” loyihasi doirasida Obid Qoʻldosh ijodi boʻyicha oʻtkazilgan, respublikamizning barcha hududlaridan 160 nafarga yaqin ishtirokchi qatnashgan tanlovning gʻolib va sovrindorlari taqdirlandilar.

Viloyat hokimligi matbuot xizmati