Botir Zaripov yana beshta davlat elchilari bilan uchrashdi
2025-05-06 14:00:00 / Yangiliklar
Mamlakatimizning iqtisodiy rivojlanishi koʻp jihatdan faol investitsiya siyosatiga bogʻliq. Shu asosda davlatimizning raqobatbardoshligi va eng asosiysi, aholi farovonligi tubdan oshadi, yangi korxona va tarmoqlar, yangi ish oʻrinlari yaratiladi. Bu oʻz navbatida diplomatik muassasalar faoliyatini rivojlantirishni talab etadi. Aniqrogʻi, mamlakatimiz sanoati va infratuzilmalarini modernizatsiya qilish va rivojlantirish uchun xorijiy investitsiyalar, ilgʻor zamonaviy texnologiyalar va ilm-fan yutuqlarini faol jalb etish zarur.
Bugun viloyat hokimi Botir Zaripovning Oʻzbekistonning Ukrainadagi Favqulodda va muxtor elchisi Alisher Qurmanov, Oʻzbekistonning Afgʻonistondagi Favqulodda va muxtor elchisi Oybek Usmonov, Oʻzbekistonning Ozarbayjondagi Favqulodda va muxtor elchisi Bahrom Ashrafxonov, Oʻzbekistonning Misrdagi Favqulodda va muxtor elchisi Mansur Qilichev, Oʻzbekistonning Pokistondagi Favqulodda va muxtor elchisi Alisher Toʻxtayev bilan uchrashuvida elchilar mansub davlatdar va Buxoro viloyati oʻrtasida iqtisodiy hamkorlikni rivojlantirish, ayniqsa, investitsiyalarni jalb qilish, infratuzilmaviy loyihalarni amalga oshirish, savdo-iqtisodiy aloqalarni mustahkamlash masalalari keng muhokama qilindi.
Buxoroning investitsion salohiyati, ushbu davlatlar investorlarini jalb qilgan holda amalga oshirish imkoniyati mavjud soha va tarmoqlar, loyihalar koʻrib chiqildi.
Xususan, Buxoro viloyatidagi erkin iqtisodiy zonalarda ilgʻor kompaniyalarni jalb etgan holda ishlab chiqarishlarni yoʻlga qoʻyish, Buxorodan qishloq xoʻjaligi, qurilish, toʻqimachilik mahsulotlari eksportini amalga oshirish, turizmni faollashtirish, farmatsevtika, transport logistikasi, kimyo sanoati, tibbiyot va taʼlim yoʻnalishlarida hamda qoʻshma loyihalarni amalga oshirish, tomonlararo tashriflar va biznes forumlarni tashkillashtirish boʻyicha amaliy yordam koʻrsatish yuzasidan kelishib olindi.
Elchilar bugun viloyatning sanoat salohiyati bilan yaqindan tanishishadi, shahar va tumanlarida amalga oshirilayotgan amaliy ishlar natijalarini borib koʻrishadi.
Viloyat hokimligi matbuot xizmati