Buxoro viloyati hokimligi

— Koʻz ilgʻamas maydagina qurtning rivojlanib, oppoq va sifatli pilla oʻragunicha boʻlgan davrda muntazam ozuqa yetkazib parvarishlash masʼuliyatli ish  hisoblanadi,—deydi masʼuliyati cheklangan jamiyati shaklidagi "Romstar" qoʻshma korxonasi rahbari Qoʻshshi Kattayev. —Shu bois, tumandagi tut plantatsiyalarini rekonstruksiya qilish, yangi koʻchatlar ekish va tutzorlar barpo etish eʼtibor markazida. 

Hozirgi kunda tumanda sanoat uchun qimmatbaho xom ashyo yetishtirish uchun jami 331 gektar tutzor talab darajasida parvarishlanayotgan boʻlib, pillakor oilaviy zvenolariga taqsimlangan. Buyurtmachi sifatida hududda "Romstar" qoʻshma korxonasi balansiga oʻtkazilgan tutzorlarni kengaytirishga eʼtibor qaratilmoqda. Hozirda bu borada 240 gektar yer maydoni rekonstruksiya qilinib, qishki mavsumda 1 million 200 ming tup tut koʻchati oʻtqazish ishlariga kirishilgan.  

Pilla mavsumi puxta tayyorgarlik bilan boshlangan kundan tumandagi 9 ta hududda ipak qurti urugʻlarini jonlantirish uchun 6 ta inkubatoriyda ishchi-mutaxassislar kuchidan foydalanildi. Yilning ilk hosili uchun harakatni boshlab yuborgan fermer xoʻjaligi va oilaviy zvenolari mehnati samarali boʻlishi uchun tizimli ravishda ragʻbatlantirilmoqda. Qolaversa, shu kunlarda "Romstar"  ipakchilik korxonasi tomonidan kasanachilar uchun har bir xonadonga sunʼiy dastalar tarqatilmoqda.  

Attaron mahallasida yashovchi tajribali pillakor Qumri Rajabova xonadoni ham joriy mavsumda 2 quti ipak qurti parvarishlab, bundan 140 kilogramm “kumush tola” yetishtirishni maqsad qilgan. Oila aʼzolari bir oylik mehnatdan soʻng 12 million soʻm atrofida daromad qilishni koʻzlashgan.   

Viloyat hokimligi matbuot xizmati