Buxoro viloyati hokimligi

Tumanning “Savrak” pillani qabul qilish maskanida alohida pavilyonda  keyingi yillarda 10 qutidan 15 qutigacha ipak qurti boqib, 1 tonnadan oshirib  “kumush tola” yetishtirish tajribasi shakllangan. Bu borada oʻndan ortiq mahalliy pillakor  chevarni oʻzida jamlagan guruhga piri badavlat, 76 yoshni qarshilayotgan Raʼno aya Usmonova boshchilik qilmoqda. Mehnatda “suyagi qotgan” onaxon shu yoshda ham faol, gʻayrat-shijoat bilan ipak qurti parvarishlab, shogirdlariga ibrat-namuna  boʻlmoqda. 

Viloyat hokimi Botir Zaripov hududda pilla yetishtirishning borishi bilan tanishar ekan, savraklik pillakor onaxon samimiy suhbat qurdi.   

— Garchi bir oylik mehnat boʻlsada, tunu kun harakat va taʼminotni taqozo etadigan jarayon bu. Balki shuning uchun yurtimizda pillakorlarga bir mavsumdagi mashaqqati uchun bir yillik ish staji hisoblanmoqda,—deydi onaxon Raʼno Usmonova. — Yana har quti ipak qurti uchun oldindan 500 ming soʻm ragʻbat puli tarqatilib, rejadan tashqari har kilogram ortiqcha topshirilgan pilla uchun tarozi boshida mukofot puli berilishi koʻplab xonadonlar uchun qoʻshimcha daromad. Pilla yetishtirish har bir kishidan eʼtibor, sabr-toqat va harakatni talab qiladi. Shu bois, zimmamizdagi ishni har yili astoydil bajarib, koʻzlagan hosilni yetishtirib, albatta, toʻkkan peshona terimizga yarasha moddiy manfaat topib kelmoqdamiz. Jamoamizga kelsak, aksari mahalladagi ishsiz, ijtimoiy muhofazaga olingan ayollar boʻlib, mavsumda yaxshigina foydaga ega chiqishmoqda.    

Aynan Raʼno Usmonovaning pillakorlikdagi shaxsiy tashabbusi va gʻayrat-shijoati, vaqt bilan hisoblashmasdan, hatto tunlari ham ipak qurti rivojini koʻzdan qochirmay, shijoat bilan ishlayotgani atrofdagi pillakor xonadonlar aʼzolari uchun yaqqol namuna. 
Onaxon jamoasi hademay koʻzlangan hosilni oshigʻi bilan taroziga tortib, 200 million soʻmga yaqin daromad qilish harakatida.    

Viloyat hokimligi matbuot xizmati