Shofirkon: do‘rmanlik Shaxodat To‘rayeva ikki quti ipak qurtidan 18 million so‘m daromadni ko‘zlamoqda
2025-05-01 21:30:00 / Yangiliklar
Mirishkor xonadon sohibasi dala-dehqonchilik ishlari, ayniqsa, pilla yetishtirishda 30 yillik tajribaga ega fidoyilardan. Umrini barkamol avlod ta’lim-tarbiyasiga bag‘ishlagan ustoz pedagog sifatida hamisha qishloqdoshlari izzat-hurmatida bo‘lgan ayolning pillachilikdagi ish tajribasi ham ko‘plarga ibratdir.
Ayni kunda Shahodat To‘rayeva umr yo‘ldoshi, farzandlari va nabiralari bilan birga oila tinchligi, farovonligi yo‘lida mehnat qilmoqda. So‘nggi yillarda ipak qurtidan barakali hosil yetishtirib, bu qiyin tarmoqda ham munosib natijalarga erishayotgan mirishkor ayol xonadonida kuni kecha viloyat hokimining xotin-qizlar masalalari bo‘yicha o‘rinbosari Hafiza Artikova ham mehmon bo‘lib, pillakorlikdagi ish uslubi bilan tanishdi.
—Halol mehnat zoye ketmas deganlaridek, o‘tgan yilgi mavsumda ikki quti ipak qurti boqib, 150 kilogrammdan orttirib pilla yetishtirgandik,—deydi Shahodat To‘rayeva.—Buning evaziga 18 million so‘mdan ortiq sof daromad olganmiz. Bu yil ham xuddi shuncha quti kirmak parvarishlab, hosilni 200 kilogramga yetkazish tashvishida harakat qilayapmiz. Erishayotgan daromadimiz albatta, mehnatdan topayotgan barakamizdan.
Darhaqiqat, o‘qituvchi sharafi bilan birga mahallada pillakorlikdek zahmatli ishni amalda uyg‘unlashtirib, ikki jabhada samarali natijaga erishayotgan bunday ayollar jamiyatimiz tayanchi, oila mustahkamligining muhim omillaridandir.
Umuman, o‘tgan yilning bahorgi mavsumida Shofirkon tumanidagi 14 ta inkubatoriyada 3898 quti ipak qurti jonlantirilib, bundan 251 tonnaga yetkazib «kumush tola» xirmonini bunyod etish harakati jiddiy olib borilgan. Pillakorlar uchun avvalo ozuqa ta’minoti bazasini mustahkamlashga e’tibor qaratilgan holda mavsum oldidan hududdagi 350 gektardan oshiq tutzor pillakor xo‘jaliklarga taqsimlab berilgani muhim manba bo‘lgan.
Tumanda buyurtmachi "Gʻijduvon ipak tola" MCHJ tomonidan 158 ta fermer xo‘jaligi va jami 1732 ta kasanachi oilaviy zvenoga ipak qurti tarqatib berilgan bo‘lib, aksariyat xo‘jaliklarda ipak qurti agrotexnik talablar asosida parvarishlangan. Har quti ipak qurti uchun oilaviy zveno va kasanachiga oldindan 500 ming so‘mdan rag‘bat puli tarqatilgani, qolaversa, «Savrak» pilla qabul qilish maskanida rejadan orttirib topshirilgan har kilogram pilla uchun tarozi boshida 50 ming so‘mdan mukofot puli berilgani pilla yetishtirishga bo‘lgan rag‘bat-qiziqishni oshirgan.
Viloyat hokimligi matbuot xizmati