Buxoro viloyati hokimligi

Pilla hosilini yetishtirishning oʻzi bir mashaqqat, shunday boʻlsada bugun tumanda ipak qurti parvarishi qizgʻin davom ettirilmoqda. "Navbahor" mahalla fuqarolar yigʻinida joylashgan pilla qabul qilish punkti va boshqa hududlardagi inkubatoriyalarda jonlantirilgan ipak qurti urugʻi 500 ming soʻmdan avans-ragʻbat puli bilan mahallalar boʻylab oilaviy zvenolar, kasanachilarga tarqatilgan. 

Eʼtiborlisi shundaki, pilla boquvchilar, kasanachilarga rejadan ortiq topshirgan har kilogram pilla hosili uchun tarozi boshida 50 ming soʻmdan naqd pul mablagʻi mukofot tarzida berilishi anʼanaga aylangan. 

Kuni kecha viloyat hokimining oʻrinbosari, oila va xotin-qizlar boshqarmasi boshligʻi Hafiza Artikova Romitan tumanida, “Qahramon” MFYda boʻlib, pillakorlar faoliyati, oilaviy zvenolarda borayotgan ishlar bilan yaqindan tanishdi. 

Joriy yilgi mavsumda tuman pillakorlari 4 ming 153 quti ipak qurtidan 252 tonna yuqori sifatli sanoat xom ashyosini yetishtirishga ahd qilganlar. Jumladan, “Qahramon” mahalla fuqarolar yigʻini "kumush tola" yetishtiruvchilari ham joriy yilda 3,5 tonnalik pilla xirmoni yaratishga bel bogʻlashgan. Ayni paytda qahramonliklardan 36 ta xonadonda ipak qurti parvarishlanmoqda. Tarmoq rivojida yuqori hosildorlikka erishish va sifatli pilla xom ashyosi yetishtirish maqsadida hududga tajribali mutaxassislar jalb qilingan. 

Jumladan, pilla yetishtirishning xitoycha agrotexnologiyasi, ish uslubi  boʻyicha "Romstar" MCHJ mutaxassisi Dilfuza Joʻrayeva ham qahramonlik kaksanachilar, oilaviy zvenolarda boʻlib, ularga kerakli yoʻl-yoʻriq berib keladi. Bu borada mirishkor kasanachi, oilaviy zveno sohibalaridan biri shu mahallada yashovchi pillakor Mavluda Namozova ham mana, oʻttiz yildan oshibdiki, barakali ipak qurti yetishtirib keladi. Shu kecha-kunduzda u oila aʼzolari bilan birga 3,5 quti ipak qurti boqmoqda. Bu mavsumdagi xirmon salmogʻi esa 250 kilogramni tashkil etmoqda.  

Tumanda “Romstar” pillani qayta ishlash korxonasi 2004-yilda ish boshlagan boʻlib, bu yerda viloyatdagi Qorakoʻl, Olot, Jondor, Romitan tumanlaridan jami 18 mingdan oshiq kasanachi, oilaviy zvenolarda yetishtirilgan pilla hosili qabul qilinib, ipak kalavaga aylantiriladi.

Viloyat hokimligi matbuot xizmati