Peshku tumanida navbatdagi tibbiy koʻrik va jarrohlik amaliyotlari oʻtkazildi
2025-04-26 10:40:00 / Yangiliklar
Respublika Shoshilinch tibbiy yordam ilmiy markazi Buxoro filiali yetakchi mutaxassislari tomonidan Peshku tumanida chuqurlashtirilgan tibbiy koʻrik va bemorlarda yukori texnologik jarrohlik amaliyotlari samarali bajarildi. Ahamiyatli jihati, tuman tibbiyot birlashmasining koʻp tarmoqli markaziy poliklinikasida tashkil qilingan aholining tibbiy koʻrigida oʻz salomatligiga befarq boʻlmagan 598 nafar fuqaro ishtirok etdi.
Qator mutaxassisliklar boʻyicha vrachlar ishtirokida boʻlib oʻtgan tibbiy koʻrikda 147 nafar fuqaroda terapevtik, 59 nafarida xirurgik, 31 nafar bemorda ginekologik, 82 nafarida ruhiy-asab kasalliklari, shuningdek, voyaga yetmaganlardan 20 nafar bolada turli kasalliklar aniqlandi. Shundan soʻng bemorlarni bosqichma-bosqich ambulator, statsionar, uy sharoitida davolash va sogʻlomlashtirish chora-tadbiri belgilandi.
Shu bilan birga, tibbiy koʻrikda jismoniy imkoniyati cheklangan va oʻzgalar yordamiga muhtoj, I-II guruh nogironlik guruhiga mansub bemorlar hududiy poliklinika vrachlari bilan birgalikda uylariga borib koʻrildi. Ularga ixtisoslik boʻyicha sogʻlomlashtirish rejasi asosida mutaxassislar tomonidan tibbiy maslahat va tavsiyalar berildi.
Shu kuni tibbiy koʻrikda aniqlangan bemorlardan 13 nafariga RSHTYOIM Buxoro filialida va 28 nafar bemorga Peshku tuman tibbiyot birlashmasida statsionar sharoitida davolanishi uchun yoʻllanmalar berildi.
Yana bir muhim jihati, filialdan tashrif buyurgan travmatolog, xirurg, ginekologlardan iborat jarrohlik amaliyoti brigadasi “Emergency department” boʻlimida toʻliq steril tibbiy asbob-anjomlar toʻplami bilan bir nechta operatsiyalarni oʻtkazdilar. “Mahorat darsi” doirasida tumandagi shifokor mutaxassislar ishtirokida bajarilgan bu jarrohlik amaliyotlari filialning yetakchi mutaxassislari tomonidan kam taʼminlangan va moddiy madadga muhtoj oilalarning 6 nafar bemorida muvaffaqiyatli bajarildi. Hozirda bemorlar ahvoli qoniqarli va tez kunda ular oyoqqa turib, uylariga kuzatiladi.
Aytish joizki, aholini chuqurlashtirilgan tibbiy koʻrikdan oʻtkazish va sogʻlomlashtirish tadbirlari yil oxirigacha davom etadi.
Viloyat hokimligi matbuot xizmati