Buxoro viloyati hokimligi

Mutaxassislarning hisob-kitob qilishicha, Buxoro viloyatidagi turdosh korxonalarda yiliga 2 ming 145 tonna pilla xomashyosi qayta ishlanadi. Birgina Vobkent tumanini olsak, bu borada joriy yil pilla mavsumida hududdagi inkubatoriyalarda 5 ming 977 quti ipak qurti jonlantirilib, parvarishlash uchun kasanachi va oilaviy zvenolarga tarqatilgan. Ayni kunda fermer xoʻjaliklari va kasanachilar bilan bahorgi mavsumda 360 tonnadan oshirib pilla yetishtirish uchun kontraktatsiya shartnomalari tuzilgan. 

— Koʻzga ilinmaydigan maydagina qurtning rivojlanib, oppoq va sifatli pilla oʻragunicha boʻlgan davrda muntazam ozuqa yetkazib berish masʼuliyatli ish  hisoblanadi, — deydi Xoʻjarabod mahallasida yashovchi tajribali pillakor Qumri Rajabova. — Shu bois, tumanda tut plantatsiyalarini kengaytirish, mavjud tutzorlarni talab darajasida saqlash, koʻchatlar ekish va parvarishlashga eʼtibor qaratilmoqda. 
 
Hozirgi kunda tumanda mavjud tutzor hajmi 366 gektarni tashkil etmoqda. "Kumushkent ipagi" MCHJ balansiga oʻtkazilgan tutzorlarni yangilash diqqat markazida. Shu boisdan, joriy yil qish-bahor mavsumida 14,8 gektar yer rekonstruksiya qilinib, unda jami 74 ming tup tut koʻchati oʻtqazildi. Ayni paytda pilla mavsumi puxta tayyorgarlik asosida boshlangan.   

Pilla xom ashyosini qayta ishlashda viloyatda koʻzga koʻringan korxonalardan biri "Kumushkent ipagi" MCHJ rahbari Bekzod Hojiyevning taʼkidlashicha, pillani qayta ishlash korxonasi tomonidan mavsum oldidan 14 ta hududda ipak qurti urugʻlarini jonlantirish inkubatoriysi ishga tushirilgan. Yilning ilk hosili uchun jadal harakatni boshlagan pillakorlar ish unumdorligiga erishish choralari koʻrmoqdalar. Jumladan, “Kumushkent ipagi” ipakchilik korxonasi tomonidan kasanachilar uchun har bir xonadonga sunʼiy dastalar yetkazib berish yoʻlga qoʻyilmoqda. Ipak qurti parvarishlaydigan oilaviy zvenolarning har biriga moddiy ragʻbat tariqasida 500 ming soʻmdan taqdim qilinmoqda.   

Viloyat hokimligi matbuot xizmati