Buxoro tumani: qoʻshxodimlik Feruz Fayzullayev ham tomorqa yerida barakali hosil yetishtirmoqda
2025-04-24 20:20:00 / Yangiliklar
Dehqonchilik xususida gap borganda, shu yil boshida Qoʻshxodim mahallasidan oʻtgan ariqning 5400 metr qismi oʻzanini betonlashtirish ishlari olib borilgani tufayli hududdagi fermer xoʻjaliklari bilan birga, oʻnlab tomorqa egalarining 80 gektardan oshiq ekin yerini nisbatan kamroq suv sarflab, sugʻorish imkoni tugʻilgani ni eʼtirof etish joiz. Qayd etish lozimki, "Kambagʻallikdan farovonlik sari" dasturi asosida mazkur ichki sugʻorish tarmogʻi pudratchi "Navroʻz Akmal stroy invest" MCHJ tomonidan rekonstruksiya qilindi.
Aynan “Qoʻshxodim” mahalla fuqarolar yigʻinidagi “yettilik” masʼullari tomonidan soʻnggi bir yilda “Yoshlar balansi” shakllantirilib, ular qiziqishi, mehnat layoqati va ijtimoiy-iqtisodiy muammolari individual tarzda oʻrganilgan. Xonadonbay xatlov ishlari olib borilib, ehtiyojmand oilalarning 57 nafar yoshiga yashash joyidan uzoq boʻlmagan, sugʻorishga qulay hududdan jami 15 gektar unumdor yer maydoni taqsiimlab berilgani koʻplarni xursand qildi. Bu yerlarda yoshlar tomonidan boshoqli don, sabzavot-poliz va dukkakli ekinlar yetishtirilayotgani ular roʻzgʻori kam-koʻstini qoplamoqda.
Shu mahalladagi Dabiyon qishlogʻida yashovchi Feruz Fayzullayev ham oʻtgan yili yoshlarga ajratilgan ekin yeridan 20 sotixini olib, dehqonchilik bilan shugʻullanishni boshlagan.
—Menga “Adizobod Erkin Mahmud” fermer xoʻjaligidan ajratilgan 20 sotixdan iborat yerda oila aʼzolarimiz bilan birga bultur kuz oylarida sabzi, lavlagi va sholgʻom ekib, yaxshi hosil olishga erishganmiz,—deydi Feruz Fayzullayev.—Bu yil boshida yerimizni 1 sotix qismida ixcham issiqxona ham qurib, erta bahordan yer tayyorlab, unda pomidor koʻchatlarini koʻchirib oʻtqazdik. Hademay, pomidorimiz hosilga kiradi. Ochiq dala maydonida esa ertangi sabzi va bulgʻor qalampirimiz tayyor boʻlmoqda.
Moʻljalga koʻra, birgina oila yaqin bir oyda 500 kilogram pomidor, yana shuncha bulgʻor qalampiri va 2 tonna atrofida sabzi hosilini yigʻib, saranjomlab olsa, bundan 40 million soʻmga yetkazib daromadga erishishi mumkin. Asosiysi, tomorqadagi halol mehnat ortidan ham moddiy manfaat, ham roʻzgʻor butligi taʼminlanmoqda.
Viloyat hokimligi matbuot xizmati