Kogon: talchalik Laziz Fayzullayev zaxkash boʻyida moʻjaz parrandachilik fermasini tashkil etdi
2025-04-24 15:45:00 / Yangiliklar
Oʻzbekiston Respublikasi Prezidentining 2023-yil 12 apreldagi “Qishloq xoʻjaligi korxonalari dala chetlaridagi yer maydonlarida mahsulot yetishtirish tizimini takomillashtirish chora-tadbirlari toʻgʻrisida”gi qaroriga muvofiq, agrar sohaning mavjud imkoniyatlaridan toʻlaqonli foydalanishga jazm qilinmoqda.
Bu borada viloyatimizda “Amu Buxoro” irrigatsiya tizimlari havza boshqarmasi tomonidan amalga oshirilayotgan ishlar ham diqqatga molik. Aniqrogʻi, boshqarma tizimidagi tuzilmalar, viloyat gidrogeologiya va meliorativ ekspeditsiyasi jamoasi, qolaversa, tashabbuskor tadbirkor hamda aholi vakillari tomonidan kollektor, drenaj tarmoqlari va zovurlar muhofaza zonasidagi tashlandiq yerlarni obod qilish, ularda talab va ehtiyojdan kelib chiqqan holda hosil yetishtirish, shu bilan birga, hududda parrandachilik, baliqchilik, quyonchilik, asalarichilik kabi biznes loyihalarini keng joriy etish tajribasi shakllanayotgani quvonarli.
Zaxkashlar boʻyida qishloq xoʻjaligi mahsulotlarini ekib yetishtirish bilan birga, suv yoʻllari atrofida sunʼiy havza qazib tayyorlab, baliqchilikka qoʻl urgan yoki tovuqxona qurib, parranda parvarishini rivojlantirayotganlar Peshkoʻ, Shofirkon, Vobkent, Jondor, Gʻijduvon, Kogon, Qorakoʻl, Olot tumanlarida ham yetarlicha.
Temiryoʻlchilar tumani Kogonda ham ana shunday uddaburro yoshlardan biri Laziz Fayzullayev oʻzi istiqomat qiladigan Niyozhoji mahallasining Talcha qishlogʻidan oʻtgan zaxkash boʻyida parrandachilik fermasini tashkil etishga kirishgan.
—Ochigʻi, chet ellarda, musofirchilikda ishlab oila boqayotganlarning sabr-bardoshiga qoyil qolish kerak. Men ham xorijdan migratsiyadan qaytib, oilam bagʻrida biror daromadli ish bilan shugʻullanish toʻgʻrisida oʻylab koʻrib shu ishga qoʻl urdim,—deydi Laziz Fayzullayev.—Ishsizligim sababli, mahallamizga yondosh hududda boʻsh turgan kollektor atrofiga parrandachilik bilan shugʻullanishni boshladim. Nega deganda, mehnatni zimmaga olsa, qisqa muddatda moʻmay daromadga erishish mumkin. Qolaversa, shu sohaga qiziqishim kuchli boʻlganidan tezda ishga kirishdim. Bugunga kelib zaxkash boʻyida qurgan va simtoʻr tortib tayyorlagan moʻjazgina fermamizda boqilayotgan oʻrdak, gʻoz, kurka va tovuq soni 80 boshga yaqinlashdi. Shuningdek, bu yerda echkilarni ham boqib koʻpaytirib, oilamiz uchun daromad manbaiga ega boʻlmoqdamiz. Jonivorlar uchun dagʻal xashak, kombi-kormi, oʻtbeda va boshqa ozuqalarini kundalik ratsionidan kelib chiqib jamgʻarib bormoqdamiz.
Laziz Fayzullayev bugun yosh tadbirkor sifatida ish boshlagan boʻlsa, u va oilasi moddiy manfaatdorligi astoydil mehnatidan asta-sekinlik bilan erishilayotgan uzviy jarayon ekanligini yaxshi tushunadi. Shu bois, u parranda soni va turini koʻpaytirishga bel bogʻlagan.
Viloyat hokimligi matbuot xizmati