Buxoro viloyati hokimligi

Bugun, 24-aprel kuni Avstriyaning “ILF Consulting Engineers” kompaniyasining bosh menejeri Filip Flox, Buxoro viloyati hokimi Botir Zaripov, Iqtisodiyot va moliya vaziri oʻrinbosari Samandar Sadullayev hamda Energiyasamaradorligi milliy agentligi masʼullari oʻrtasida Buxoroda “ILF Consulting Engineers” kompaniyasi bilan viloyatdagi ijtimoiy soha muassasalari hamda maʼmuriy binolarning energiya samaradorligini oshirish hamda ularni barqaror issiqlik bilan taʼminlash loyihalarini boshlash yuzasidan uchrashuv oʻtkazildi.

Maʼlum qilinishicha, joriy yilda Buxoroda tajriba sinov tariqasida 100 ga yaqin taʼlim va tibbiyot muassasalari, maʼmuriy inshootlari binolarining energiya samaradorligi oshiriladi hamda ularning issiqlik taʼminoti qayta tiklanuvchi energiya manbalari qurilmalari asosida toʻliq modernizatsiya qilinadi. 

Ushbu turdagi loyihalar joriy yilda respublika miqyosida 60 dan ortiq obyektlarda davom ettirilib, kelgusi yildan boshlab Buxoro tajribasi asosida orttirilgan bilim va qoʻnikmalar asosida respublika miqyosida keng joriy qilinadi.

Muloqotda loyihani amalga oshirish mexanizmlari hamda qoʻllaniladigan innovatsion texnologiyalar yuzasidan batafsil fikr almashildi. 
Bundan tashqari, innovatsion texnologiyalarga asoslangan isitish tizimini yaratish, shuningdek, qayta tiklanuvchi energiya manbalari va energiya tejovchi texnologiyalardan keng foydalanish imkoniyatlariga ham alohida eʼtibor qaratildi.

Uchrashuv yakunida tomonlar oʻzaro hamkorlikni yanada kengaytirish va belgilangan maqsadlarga erishish uchun tizimli ishlashga kelishib olishdi.
Bugundan kompaniya mutasaddilari viloyatdagi loyiha amalga oshiriladigan ijtimoiy soha obyektlarida instrumental oʻrganishlarni boshlab yuborishdi. 

Maʼlumot uchun: ILF Consulting Engineers — xalqaro muhandislik va konsalting kompaniyasi boʻlib, shtab-kvartirasi Rum/Insbruk (Avstriya) va Myunxen (Germaniya)da joylashgan va butun dunyo boʻylab 45 dan ortiq vakolatxonalari mavjud. Kompaniya 1967-yilda tashkil etilgan hamda infratuzilma, energetika, atrof-muhit muhofazasi va sanoat loyihalarini ishlab chiqish, rejalashtirish va amalga oshirish boʻyicha dunyoning eng yetakchi injenerlik tashkilotlardan biri hisoblanadi.

Viloyat hokimligi matbuot xizmati