Shofirkon: Hakim Islomov uy xoʻjaligida 1 500 bosh “broyler” joʻja parvarishlanmoqda
2025-04-23 21:15:00 / Yangiliklar
"Har bir oila – tadbirkor" dasturi doirasida Guliston mahallasida yashovchi Hakim Islomov xonadoni aʼzolari ham parrandachilikni rivojlantirishga ahd qilishgan. Tuman hokimining mahalladagi yordamchisi tavsiyanomasi asosida imtiyozli kredit mablagʻini rasmiylashtirib olgan xonadon ahli 40 kunda yetilib, parhezbop goʻshtga topshiriladigan “broyler” joʻja boqishda yetarli tajribaga ega.
Shu bois, ayni paytda Islomovlar uy xoʻjaligidagi ogʻilxonada alohida tovuqxona qurib, veterinariya talablariga binoan parvarishlanayotgan joʻja soni 1500 boshga yetkazilgan. Loyihaning afzalligi—qisqa muddatda yuqori hosildorlikka erishish imkoniyatidir. Qolaversa, mirishkor parrandaboqarlar bir yilda 5-7-martagacha “broyler” joʻja boqib, umumiy hisobda 5 tonnagacha parhezbop goʻsht tayyorlab sotishi, moʻmay daromadga erishishi mumkin.
Hakim Islomov tovuqxonasiga kelsak, bahor kunlarida joʻjalarga moʻtadil havo harorati va namlik saqlanib, suv va ozuqa bilan avtomatik taʼminlash mexanizmi qoʻllanilmoqda. Muhimi, xonadonda ekologiya va sanitariya talablariga javob beradigan tovuq goʻshti tayyorlanmoqda. Parranda ratsionidagi yem-xashak, zarur darmondori, minerallarning tabiiy manbalari tayyorlangan boʻlib, biologik himoya qilishning ishonchli tizimi yaratilgan.
Qolaversa, har hafta–10 kunda emlashlarini oʻtkazib, maxsus minerallar bilan boyitilgan kombi-kormi, ozuqasini saralab olish taqozo qilinadi.
Bir yilda 5-martagacha “broyler” tovuq yetishtirishga jiddiy kirishgan Hakim Islomovning hisob-kitoblariga koʻra, har bir partiyadan oʻrtacha 15 million soʻm miqdorida sof daromad olish mumkin. Bu degani, intilish va harakat boʻlsa, joriy yil yakunigacha 90–100 million soʻmgacha moddiy manfaat topish mumkin ekan. Hozirda mirishkorlar tovuqxonasida oila aʼzolari bandligi taʼminlangani barobarida moʻmay foydaga erishilmoqda. Aniqrogʻi, 40 kunlik parvarishdan soʻng har bir bosh parranda oʻrtacha 1,5 kilogramdan goʻsht mahsulotini berganida, bu 2200 kilogram parhez goʻsht deganidir.
Mahsulotning bozor bahosi va erishiladigan foydani hisob-kitob qilish esa qiyin emas.
Xulosa shuki, tumanda gulistonlik Islomovlar oilaviy faoliyati tijorat banki imtiyozli kredit mablagʻi orqali oʻz ishini boshlagan, qisqa muddatda daromad keltiruvchi biznes loyihasini amalga oshirayotgan muvaffaqiyatli tashabbuslardan biri sifatida ommalashtirilmoqda.
Viloyat hokimligi matbuot xizmati