Buxoro viloyati hokimligi

Shulardan biri—"Jayxunobod" mahalla fuqarolar yigʻinida yashovchi Shahnoza Polvonova uy xoʻjaligidir. Bunda tomorqa yerining 2 sotixidan oshiqrogʻida barpo qilingan issiqxona va ekin yerida yetishtirilayotgan hosil, shuningdek, ogʻilxonani obod qilib, chorva mollari, qoʻy-qoʻzi va parranda boqilayotgani hisobidan mehnatsevar oila barqaror daromad manbaiga ega boʻlgan. 

Birgina issiqxonada shu yil boshidan kartoshka, bodring, pomidor, baqlajon va qulupnay bilan birga kashnich, shivit, sarimsoqpiyoz yetishtirilayotgan boʻlib, yana 15 tupga yaqin limon butasi ham parvarishlanmoqda. Mahalliy tajribaga koʻra, qoplarga goʻng aralashmasi bilan tuproq solinib, kartoshka urugʻligi qadalgan boʻlsa, ikkiga boʻlingan rezina quvur asosiga tuproq solinib, qulupnay koʻchati oʻtqazilib, parvarishlanmoqda. Joʻyaklar qatorlari oralab tomchilatib sugʻorish tarmogʻi tortilgan tomorqa yerida mirishkorlar uch oylik mehnatdan soʻng 400 kilogram bodring, yarim tonna atrofida kartoshka va qulupnay yetishtirish harakatidalar. Bundan bir xonadon xoʻjaligi koʻzlayotgan daromad salmogʻi ham 40 million soʻm atrofida ekan. 

Tomorqa bilan birga oila mirishkorlari 30 bosh tovuq parvarishlab, kuniga 25 dona tuxum olishga erishayotgan boʻlsalar, qoʻrada 8 bosh qoʻy, yana shuncha echki boqib, roʻzgʻorga baraka kiritmoqdalar.  

— Koʻrib turganingizday, hovlimiz kichkinaligidan boshida ikkilanib ish boshlaganmiz. Issiqxonamizda ishlab, moʻl hosil va moʻmay foydaga erisha boshlaganimizdan soʻng ogʻilxonada tuyoq sonini koʻpaytirishga kirishganmiz,—deydi xonadon bekasi Shahnoza Polvonova.—Naslli qoramollardan avvaliga buzoq olib, boqib, ayni kunda sigir va hoʻkizlarni yetishtirmoqdamiz. Xomchoʻt qilsak, roʻzgʻorimiz ehtiyoji uchun yiliga 1 tonna atrofida goʻsht ham yetishtirayotgan ekanmiz. Shu kunlarda ekin yerimizni kengaytirish harakatidamiz. Bu ham roʻzgʻorga foyda, albatta. Mehnat qilgan odam hech qachon kam boʻlmasligi dalolati. 

Viloyat hokimligi matbuot xizmati