Buxoro viloyati hokimligi

Shu bois, keyingi yillarda chorvaga ixtisoslashgan fermer xoʻjaliklari imkoniyatlari oshirilayotgani barobarida aholi xonadonlarida qoramol boqish tajribasi ommalashayotganini "Qozon" MFY da yashovchi Ravshan Karimov xonadoni misolida ham koʻrishimiz mumkin. Oila sohibi koʻp yildirki, qoʻy boqish bilan shugʻullanadi. 

—Qoʻy boqqanlar yaxshi bilishadi, oʻzimizda qishning quruq izgʻiriniyu yoz jaziramasida jaydari hisori qoʻyni ham boqish oson ish emasligini,—deydi qoʻychilikda katta tajribaga ega Ravshan Karimov. —Ammo men oilamiz bilan shu qoʻyni naslda va boʻrdoqichilikda astoydil boqib koʻrishni niyat qilganmiz. Albatta, talab yuqoriligidan bu nasldor qoʻyning 3-4 oylik qoʻzisi ham bozorda arzon emas.

 Xonadon sohibining aytishicha, hozirda bu xoʻjalikda parvarishlanayotgan qoʻylar oʻrtacha narxi 2 million soʻmdan 8 million soʻmgacha baholanayotgan ekan. Ayni paytda bu qoʻylar zarur emdorisi-aksina bilan emlanmoqda. Ozuqa sifatida kundalik ratsioni makkajoʻxori, kepak, arpa, suli yormasi va beda oʻtidan iborat. Bir soʻz bilan aytganda, zotdor qoʻy tuyogʻi koʻpaytirilayotgani allaqachon Karimovlar oilasi daromad manbaiga aylangan.

—Chorva uchun ozuqa bazasi yaratilsa, kifoya. Chetdan qaraganda, mol boqish, foyda koʻrish mashaqqatli tuyuladi, chindan shunday. Ammo xonadonimiz aʼzolari, farzandlar bilan mehnatimiz mahsulini koʻrganimizda, boʻrdoqiga mol boqib, qoramol yoki buzoq, nasldor qoʻy sotib moddiy manfaat topganimizda koʻrgan qiyinchiligimiz unutiladi,—deydi Ravshan Karimov.—Aytish joizki, bir oila roʻzgʻor yukini tortish, dasturxon toʻkinligini taʼminlab, goʻsht, sut, qatiq, sariyogʻ kabi darmondoriga boy mahsulotlarni serob qilishda bu tarmoqning ahamiyati bisyor.   

Viloyat hokimligi matbuot xizmati