Buxoro viloyati hokimligi

Korxonalarda boʻlgan shahar rahbari Mirshakar Toʻraboyev boshchiligidagi ishchi guruhi tadbirkorlar bilan yuzma-yuz muloqot qilib, ular faoliyatini jonlantirish, mavjud muammolarini hal qilish, qoʻshimcha ishchi oʻrinlarini yaratish borasidagi ishlar bilan qiziqdilar. Jumladan, "BUXORO GYPSUM" MCHJda gips, quruq qorishmalar va gipsakarton ishlab chiqarilmoqda. Bugungi kunda korxonada 80 kishi ish bilan band. Eksportga yoʻnaltirilayotgan yoki ishlab chiqarilayotgan mahsulotlar toʻliq xitoylik muhandislar tomonidan  tizimlashtirilib, ishlab chiqarish jarayoni muvofiq olib borilmoqda. Korxona yiliga ichki bozordan tashqari 2,5-4 million AQSH dollarigacha mahsulot eksportini amalga oshiradi. 

Navbatdagi korxona "CAPITAL GRAND GROUP" MCHJ boʻlib, korxona sutkasiga 60 tonna un ishlab chiqarish quvvatiga ega. Korxona mahsulotlari 100 foiz Afgʻoniston respublikasiga eksport qilinmoqda. Qozogʻiston respublikasidan bojxona tartibida qayta ishlash rejimi bilan mahsulot import qilinib, oyiga 150-200 ming AQSH dollariga teng un mahsulotlari toʻliq eksportga yoʻnaltirilishi korxona uchun juda qulay va moddiy manfaatlidir. Ayni paytda  yil yakuniga qadar korxona hamkorlarini uzliksiz mahsulot bilan taʼminlash va xom ashyo xaridi uchun tijorat banki orqali qoʻllab-quvvatlash choralari koʻrilmoqda. Bu bilan korxona barqaror ishlashi taʼminlanadi.   

Muloqot davomida eksport mahsulotlar turlarini koʻpaytirish boʻyicha yangi investitsiya loyihalarini ishlab chiqish, eksport bozorlarini izlash, korxonalarni toʻliq quvvatlarda ishlashini taʼminlash, mavjud ish oʻrinlarini saqlash va korxonalarni uch smenada ishlatish orqali yangi ish oʻrinlarini yaratishga eʼtibor qaratilmoqda. Shu bilan birga, korxonalarda mahsulot ishlab ishlab chiqarish jarayonida yuzaga kelgan muammolarni bartaraf etish orqali sifatli va raqobatbardosh mahsulot ishlab chiqarish dolzarb ahamiyatga ega. 

Viloyat hokimligi matbuot xizmati