Buxoro shahri: “Loyihalar yarmarkasi”da 48 ta biznes loyiha koʻrib chiqildi
2025-04-11 16:45:00 / Yangiliklar
Buxoro viloyat hokimligi va markaziy bank viloyat bosh boshqarmasi tomonidan ishlab chiqilgan reja-grafikka asosan viloyatdagi 13 ta shahar tumanlarda har oyda ikki marotaba “Loyihalar yarmarkasi” tashkil etish amaliyoti yoʻlga qoʻyilgan. Mazkur yarmarkalarda Sayxunobod, Uychi, Zarbdor hamda Gʻijduvon tajribalari asosida tayyorlangan biznes rejalari taqdimoti ham boʻlib oʻtmoqda. Muhimi, bunda havaskor tashabbuskorlar loyihalari qoʻllab-quvvatlanib, oilalarga moddiy manfaatdorlik imkoniyati yaratilmoqda.
Jumladan, Buxoro shahridagi "Kasbiy koʻnikmalar" markazida tashkil etilgan navbatdagi yarmarkada ham masʼul tijorat banklari vakillari, mahallalar “yettiligi” maʼmuriyati hamda tadbirkorlik faoliyatini kengaytirib, yangi ish oʻrinlari yaratish niyatida boʻlgan tashabbuskorlar, biznes faoliyatini yoʻlga qoʻymoqchi boʻlgan fuqarolar ishtirok etdilar.
"Loyihalar yarmarkasi" doirasida aholining tadbirkorlik faoliyatiga daxldor ishlab chiqilgan 42 ta biznes reja mahallalarga biriktirilgan tijorat banklari vakillari, hokim yordamchilari va tadbirkorlar ishtirokida muhokama qilindi. Chunonchi, yakka tartibda novvoylik, milliy shirinliklar, turli pishiriqlar tayyorlashdan tortib, uyda tikuvchilik asosida kasanachilik qilish, chevarlik sexini moddiy qoʻllab-quvvatlash, uy kosmetik taʼmiri, hunarmandchilik va boshqa yoʻnalishlardagi ishlar koʻrib chiqildi. Yarmarka doirasida umumiy qiymati 5 milliard 300 million soʻmga teng 48 ta tashabbuskorning loyihasi tijorat banklari tomonidan maʼqullandi.
Ahamiyatlisi, bu saʼy-harakat natijasida hududda mingdan ortiq yangi ish oʻrni yaratiladi.
Jahongir Fozilov,
BuxDU talabasi