Shofirkon: "Koʻrishkent shirinliklari" ning buyurtmachilari koʻpaymoqda
2025-04-09 18:45:00 / Yangiliklar
Koʻrishkent qishlogʻida yashovchi Mohigul Joʻrayeva oʻz qatʼiyati va intilishi tufayli oilaviy tadbirkorlik yoʻnalishida muvaffaqiyatga erishayotgan ayollardan biri. Mutaxassisligi hamshira boʻlgan Mohigul ikki yil avval biznes tashabbusi bilan chiqib, oʻzining shirinlik sexini tashkil etishga kirishgandi.
Bu maqsadda u tuman hokimining mahalladagi yordamchisi tavsiyasi asosida 16 million soʻm miqdorida imtiyozli kredit mablagʻini olib, "Koʻrishkent pishiriqlari" nomli sexini ochdi. Zarur jihozlar bilan taʼminlangan kichik korxonada dastlab korjik, pryanik va boshqa shirinliklar pishirib sotish yoʻlga qoʻyilgan boʻlsa, keyinchalik mahsulot turlari kengaytirildi.
Mahallada oʻtadigan toʻy-marosimlari uchun shirinliklar, tort va pishiriqlar, salat va somsalar hamyonbop narxlarda, buyurtma asosida tayyorlab beriladigan boʻldi. Bugunga kelib esa sexda oyiga qariyb 10 million soʻm atrofidagi qandolat mahsuloti uch nafar ishchi bilan sifatli tayyorlab berilmoqda.
Mohigul Joʻrayeva farzandlari koʻmagida pishiriq va tortlarni tayyorlash bilan band boʻlganida toʻy-marosimlar uchun buyurtma koʻpayganda, ovsinlari unga beminnat koʻmakchiga aylanishadi. Bu esa oilaviy hamjihatlik va tadbirkorlik tufayli bir nechta oilaning qoʻshimcha daromadga ega boʻlayotgani dalolati.
Buyurtmalar sonidan kelib chiqib, Mohigul Joʻrayeva jamoasi ayni kunda sexni kengaytirish va pishiriq turlarini koʻpaytirish harakatida. Bu urinishlar albatta, oilaviy daromadni oshirish, aholi dasturxonini sifatli va mazali shirinliklar bilan taʼminlash imkonini bermoqda.
Viloyat hokimligi matbuot xizmati