Buxoro viloyati hokimligi

Shundan kelib chiqib, viloyatning Olot tumanida ham elektr energiyasi sarfini kamaytirish, muqobil energiya jihozlarini keng joriy etish orqali mahalla va qishloqlarda ijtimoiy soha inshootlari, xususan, aholi xonadonlarini uzluksiz elektr energiyasi bilan taʼminlashda amaliy natijalarga erishilmoqda. 

Jumladan, keyingi ikki oyda tumandagi aksariyat korxona, tashkilot, muassasalar hamda koʻp qavatli uylar, aholi xonadonlarining kirish qismlariga sensorli, energiya tejovchi, datchikli lampalar oʻrnatilganligi energiya sarfini tejash imkonini bermoqda. Bundan tashqari, aholi xonadonlariga "Yashil kredit" loyihasi doirasida quyosh panellarining oʻrnatilayotganligi bu boradagi ishlar samaradorligini oshirmoqda.

Jumladan, "Soinqorovul" mahalla fuqarolar yigʻinida yashovchi Hasan Yaxshiyev ham namuna tariqasida oʻz uyida 50 kilovat soat quvvatli quyosh panellarini oʻrnatgani yuqoridagi fikrimiz dalili.  

—Olis hududimizda elektr energiyasi taʼminotidagi uzilish va muammolar sababli muqobil energiyadan foydalanishga qaror qilib adashmagan ekanmiz. Quyosh paneli xonadonimizda elektr energiyasi bilan bogʻliq tashvishni butunlay bartaraf etmoqda,—deydi xonadon egasi Hasan Yaxshiyev.—Mahallada namuna sifatida  birinchilardan boʻlib 50 kilovat soatga teng quyosh panellarini uyimizga oʻrnatganimiz juda qoʻl kelmoqda. Shuning uchundir, hozirda mahallamizda quyosh panellari oʻrnatayotganlar soni ham koʻpaymoqda. Muhimi, endi xonadonimizda  uzluksiz elektr energiyasi boʻladi. 

Muqobil energiya manbaiga ega boʻlishning imtiyozi shundaki, avvalo resurs manbai iqtisod qilinmoqda. Yana Hasan Yaxshiyev kabilarga yer, mulk soligʻini toʻlashda qator imtiyozlar berilgani qatorida kuniga 350-400 ming soʻm atrofida daromad ham koʻrish imkoni yaratilmoqda. Endilikda xonadon chiroqlari, televizor, muzlatkich, dazmol, mikrotoʻlqinli pech va boshqa maishiy jihozlardan buyumlardan muqobil elektr manbai orqali foydalanish mumkin. Qolaversa, bu borada imtiyozga ega xonadon sohibi mazkur batareyalar orqali ishlab chiqarilgan elektr energiyasining ehtiyojdan ortgan qismini hududiy elektr tarmoqlari korxonasiga sotishga erishmoqda. Hisob-kitobga koʻra, xonadon ehtiyojidan tashqari oyiga 10 ming kilovat elektr energiyasini sotishning uddasidan chiqmoqda. Bu degani, xonadon oyiga ijobiy tafovut bilan 10 million soʻm atrofida daromad koʻrmoqda.

Tumanda qulay, foydali va xavfsiz boʻlgan quyosh panellarini aholi xonadonlariga oʻrnatish ishlari tizimli ravishda amalga oshirilmoqda.

Viloyat hokimligi matbuot xizmati