Buxoro viloyati hokimligi

Koʻp yillik tajribadan kelib chiqqan holda joriy mavsumda ham viloyatda ertapishar “Buxoro-102”, “Buxoro-10” (“Sardor”), “Porloq” va oʻrtapishar “Buxoro-6”, “Buxoro-8” kabi mahalliylashtirilgan gʻoʻza navlari ekib parvarishiga kirishildi. Navlar hududlarning tabiiy-iqlim sharoiti, oʻziga xos xususiyatlaridan kelib chiqib joylashtirilmoqda. 

Buxoro tumanida esa joriy mavsumda paxtachilikka ixtisoslashgan 239 ta fermer xoʻjaligi dalasida 7 ming 200 gektar yerda chigit ekish chora-tadbiri koʻrilmoqda. Shundan 2 ming 800 gektar yerda chigit Xitoy texnologiyasi asosida 76 x 10 sxemasida ekilmoqda. Ayni kunda tuman paxtakor dehqonlari 1 ming 400 gektar yerda chigitni plyonka ostida ekmoqdalar. Bunda hududga qoʻshimcha 16 ta yangi zamonaviy rusumdagi ekishgich olib kelingani ayni muddao.

Hududda gʻallachilik va paxtachilikda peshqadam subyektlardan biri, “Rabotak” MFYda katta tajribaga ega, “Mehnat shuhrati” ordeni sohibi Ibrohim Toʻqliyev boshchiligidagi “Oʻktam Ibrohim Toʻqli” fermer xoʻjaligida ham  chigit ekish,  gʻalla parvarishi, yerlarni oziqlantirish hamda eksportbob poliz va sabzavot mahsulotlarini ekib yetishtirish ishlari uyushqoqlik bilan olib borilmoqda.  

Hademay, faoliyat boshlaganiga 20 yil toʻladigan va ayni kunda 85 gektar ekin yeriga ega bu fermer xoʻjaligida 40 gektar yerda sanoat uchun qimmatbaho paxta xom ashyosi, 28 gektarda boshoqli don, 10 gektar yerda sabzavot-poliz mahsulotlari yetishtirilmoqda. Shuningdek, 2 gektar maydonda intensiv bogʻ barpo qilingan xoʻjalikda chorvachilik rivojlantirilayotgan boʻlib, qoramol soni 50 boshga yetkazilgan. Qoʻshimcha daromad sifatida asalarichilikka qoʻl urilgan boʻlib, asalari uyasi 40 taga yetkazilgan. 

Bogʻ-tokzor qator oralarida mahsulot ekish, ayni kech kuz oylaridan “toʻqsonbosti” usulida sabzavot va koʻkatlar yetishtirish, dala chetlarida tut, tol, terak, jiyda kabi daraxt nihollari bilan birga, tok qalamchalarini oʻtqazib, tokzorlarni kengaytirish, aholi dasturxonini sarxil qishloq xoʻjaligi mahsulotlari, meva-sabzavot bilan toʻldirish hamisha dolzarb vazifa sanalgan. Bugun bu borada aynan “Oʻktam Ibrohim Toʻqli” fermer xoʻjaligida katta tajriba toʻplangan.  

Buning uchun tarmoqlar rivojida xoʻjalikning 20 nafardan ortiq ishchi-xizmatchisi, mexanizator-suvchilari alohida jonbozlik koʻrsatishmoqda. Erta bahorgi chigit ekish va boshqa agrotexnik ishlar uchun xoʻjalikda oʻndan ortiq yuqori unumli texnika vositasi kuchidan oʻz oʻrnida, samarali foydalanilmoqda.           
 
Viloyat hokimligi matbuot xizmati