Buxoro viloyati hokimligi

Aynan hunarmandchilik tufayli bugun oʻnlab xonadonlarda chevar xotin-qiz bandligi taʼminlanib, oilalar moddiy manfaatdorligi taʼminlanayotgani quvonarli, albatta. Bu kambagʻallikni qisqartish, aholi bandligi va ijtimoiy-iqtisodiy barqarorlikni taʼminlashning muhim omili boʻlib xizmat qilmoqda. Shu jumladan, hozirda viloyat markazidagi birgina "Xoʻja Gʻunjoriy" mahallasida ham yuqoridagi saʼy-harakat samarasini koʻrish mumkin.  

Bugunga kelib bu mahallada 986 ta xonadon, 1187 ta oila va ularda jami 4 ming nafardan ortiq aholi umrguzaronlik qilayotgan boʻlib, hudud asosiy rivojlanish drayveri xizmat koʻrsatish, savdo va ishlab chiqarish tarmoqlaridir. Yaratilayotgan  imkoniyat va imtiyozlardan unumli foydalangan holda hunarmandchilik faoliyatini yoʻlga qoʻyganlardan biri Nargiza Qurbonova ham shu mahallaning Mirdoʻstim koʻchasida istiqomat qiladi. 

Xorijiy migratsiyadan qaytarilgan bu ayolga mahalladagi hokim yordamchisi tavsiyanomasi asosida 33 million soʻm imtiyozli kredit mablagʻi ajratilgan boʻlib, bu sarmoya avvalo, uyda yakka tartibda ishlab, koʻhna uslub asosida, turlicha naqshlar tushurilgan ayollar milliy choponlarini tikishga safarbar etildi. Shu maqsadda zamonaviy rusumdagi “JACK” tikuv mashinasi va “overlo” uskunasi sotib olindi. Xayrli ish ortidan chevar ayol yana 2 nafar ishsiz xotin-qizning bandligini taʼminlamoqda.  

“Hunar—hunardan unar” deganlaridek, chevarlarning ishi va erishayotgan daromadi ham chakki emas. Nargiza Qurbonova milliy urfdagi, rangin choponlarini  nafaqat Buxorodagi, balki, Toshkent shahridagi buyurtmachilariga ham tez va sifatli tikib yetkazib berib, moddiy manfaat topmoqda. Hunariga sinchkovlik bilan yondashib, mijozlari sonini oshirayotgan chevarlar endilikda faoliyatni  kengaytirish harakatidalar. 

Viloyat hokimligi matbuot xizmati