Buxoro tumani: Matluba Hamidova issiqxonasida qulupnaydan 1,5 tonnadan oshirib hosil koʻzlamoqda
2025-03-17 17:15:00 / Yangiliklar
Joriy yil erta bahor kunlaridan hududda kam taʼminlangan va ijtimoiy muhofazaga olingan 2 ming 600 nafar fuqaroga auksion tartibida 10 sotixdan 30 sotixgacha, umumiy maydoni 571 gektar ekin yeri taqsimlab berilgani joylarda dehqon xoʻjaliklari tashkil etish va ehtiyojga yarasha mahsulot yetishtirish imkonini bermoqda. Buning hisobidan esa joriy yil aholi rizq-roʻzi manbai, sabzavot-poliz mahsulotlari, dukkakli ekinlar yetishtirish salmogʻi yanada oshirilmoqda.
Qulupnay nafaqat xushxoʻr taʼmi, balki bahorning ilk neʼmatlaridan biri sifatida dasturxonimizga yetib kelishi bilan qadrli. Qolaversa, uning shifobaxsh jihatlari koʻp. Qulupnay tarkibidagi foydali minerallar ovqat hazm qilish tizimiga yaxshi taʼsir qiladi, organizmni tozalaydi, qarish jarayonini sekinlashtiradi, kishi kayfiyatini koʻtaradi. Shu bois, tansiq qulupnayning har doim, har joyda xaridori koʻp. Uni yetishtirish esa yaxshigina daromad keltirishi tajribadan oʻtgan.
Jumladan, Buxoro tumani “Rabotiqalmoq” mahalla fuqarolar yigʻini Bunyodkor qishlogʻida yashovchi Matluba Hamidova ham tomorqasidagi 20 sotixdan iborat issiqxona yerining teng yarmida bodring, qolgan yarmida esa qulupnay ekib yetishtirishga jiddiy kirishgan.
Gap shundaki, bu mirishkor xonadon ahli 2017-yildan boshlab issiqxonasida qulupnay yetishtirishni boshlagan. Albatta, oilasi uchun bu ish yaxshi daromadbop ekanini tushungan Matluba Hamidova imkoniyatdan unumli foydalanmoqda. Oila bekasi joriy yil dastlabki oyidan yana bir innovatsiyaga qoʻl urgan. Issiqxonasini kengaytirib, unda sara navli qulupnayning eksportbop, daromadli xilidan yetishtirish harakatiga tushilgan. Eʼtiborlisi, issiqxonada yetishtirilgan qulupnay boshqalarga nisbatan 25-30 kun avval pishib yetiladi. Bu esa yuqori narxda va tezkorlik bilan mahsulot sotish hamda yiliga 2-3-martagacha hosil olish imkonini yaratadi.
—Bir necha yildan buyon issiqxonamizda qulupnayning “Oʻzbekiston” navini yetishtirib yaxshigina daramad olib kelyapmiz,—deydi Matluba Hamidova.—Qulupnay koʻp yillik oʻsimlik boʻlib, undan bir marta ekib yetishtirishdan bir necha mavsumda hosil terib olish mumkin. Hozirda biz 10 sotix yerdan 1,5 tonadan oshirib hosil olishni koʻzlaganmiz. “Oʻzbekiston” navi esa qishga yaxshi chidamli. Aholi tomorqachilari orasida keng ommalashgan bu xil mevani koʻplar jaydari qulupnay deb ham ataydi. Mevasi kattaroq, qizil, nordon-shirin, xushboʻy tamli boʻladi.
Viloyat hokimligi matbuot xizmati