Buxoro tumani: Tilav Sodiqov, Allanazar va Rajab Xudoynazarovlar tomorqalarida ertangi sabzavot yetishtirilmoqda
2025-03-17 11:10:00 / Yangiliklar
Tomorqa yeri daromad manbai, bitmas-tuganmas xazina ekanini teran tushunib yetgan mirishkor dehqonlar xizmati bilan bugunga kelib tumanda har biri 2 sotixdan 10 sotixgacha boʻlgan issiqxona soni 1 ming 900 taga yetkazilgan. Bu xoʻjaliklar tasarrufidagi ekin yeri esa 90 gektarni tashkil etayotgani, ularda yiliga kamida ikki-uch marta hosil yetishtirilayotganini hisobga olsak, elimiz dasturxonini toʻkin qilishda tomorqa xoʻjaliklari hissasi yanada yaqqol koʻzga tashlanadi.
Jumladan, “Yangi turmush” mahalla fuqarolar yigʻinida aholi tomorqalaridan samarali foydalanishni targʻib qilish va tomorqachilikni rivojlantirishga alohida eʼtibor qaratilmoqda. Ayniqsa, mahalla “yettiligi” saʼy-harakati tufayli ijtimoiy muhofazaga muhtoj, kamdaromadli xonadonlarga bepul ixcham issiqxonalar qurib berish yoʻli bilan ularga ishlab, moddiy manfaatdor boʻlishlari uchun imkoniyat yaratilmoqda.
Beshariq qishlogʻida yashovchi Tilav Sodiqov, Baxodir Ahmedov Qorajeri qishlogʻida yashovchi Allanazar Xudoynazarov va Rajab Xudoynazarov xonadonlarida ham tomorqa yeri har qarichidan unumli foydalanishda katta tajriba toʻplangan. Yil boshidan bu oilalar mirishkorlari ekin yerini obod qilib, kartoshka, pomidor, bodring, bulgʻor qalampiri, sarimsoqpiyoz kabi mahsulotlarni ekib yetishtirib, avvalo oʻz roʻzgʻor xoʻjaliklari ehtiyojini badastir qilishga oʻrganishgan. Mahalla maʼmuriyati oʻrganishlari bilan tomorqa xoʻjaliklari suv taʼminoti, ekin yerini sugʻorish tarmoqlari shay qilinmoqda. Eʼtiborlisi, ular ish uslubi mahalla va qishloqlarda ommalashtirilmoqda.
Shuningdek, hudud aholisi dala-dehqonchilik, issiqxona mehnati bilan birga chorvachilik, bogʻ-tokzorchilik, parranda parvarishi yoʻnalishlarida ham faol boʻlib, daromadbop tarmoqlarda mavjud imkoniyatlardan samarali foydalanib, aholi dasturxoni toʻkinligini taʼminlashda baholiqudrat hissa qoʻshmoqda.
Baʼzi maʼlumotlarga nazar solsak, oʻtgan yil ikkinchi yarmida tuman tomorqachilari tomonidan 660 gektar yerda “toʻqsonbosti” uslubida sarimsoqpiyoz, koʻk piyoz, karam, lavlagi, oshqovoq, sholgʻom va osh koʻkatlar yetishtirilgan boʻlsa, joriy yil erta bahoridan kirishilgan dala-dehqonchilik ishlarida hududdagi 3 ming gektardan ortiq tomorqa yerida kartoshka, pomidor, bodring, piyoz, bulgʻor qalampiri, karam, baqlajon va boshqa sabzavot-poliz mahsulotlari yetishtirilmoqda.
Viloyat hokimligi matbuot xizmati