Buxoro viloyati hokimligi

—Oʻzimizning tomorqamizda har yili turli xildagi poliz mahsulotlarini yetishtirib, yiliga oʻrtacha 80 million soʻm qoʻshimcha daromad olyapmiz. Tomorqamizga ertapishar qovunning “dakara” navini ekishni boshlaganmiz, pishib yetilgan hosilni may, iyun oylarida uzib, saranjomlaymiz,—deydi “Navbahor” MFY da koʻp yildirki, qovun yetishtirish bilan shugʻullanayotgan tajribali dehqon Ibrohim Muhammedov.—Hududda har yilning fevral oyidan boshlab qovun urugʻidan ekib parvarishni boshlaymiz. Bunda asosan “dakara”, “kampirchopon”, “koʻkcha”, “aeroport” kabi navlar tanlab, ekib parvarishlanadi. Serquyosh dalalarimizda shu kunlarda qovun bilan birga tarvuz ham ekilmoqda. 

Joriy mavsumda Navbahor mahallasida “Bir kontur — bir mahsulot” tamoyili asosida 20 gektar yer maydoni aynan qovun-tarvuz ekib yetishtirish uchun oʻz egalariga taqsimlab berilgan. Bugunga kelib bu yerning 4 gektar maydonida tarvuzning “Nasso” va “Global” naviga mansub urugʻlari qadalgan. Bu jarayonda dehqon xoʻjaliklariga Fermer, dehqon xoʻjaliklari va tomorqa yer egalari tuman kengashi hamda “Turonbank” tuman filiali yaqin hamkor, taʼminotchi va buyurtmachi sifatida koʻmaklashmoqda. Uch oylik parvarishdan soʻng, pishiqchilik mavsumida polizkorlar mahsulotini bemalol ularga sotib, nafaqat sarf-xarajatlarini qoplashlari, moddiy manfaat topishlari mumkin.   

—Bizda 6 gektarga yaqin dala tomorqamiz mavjud boʻlib, issixonamizda qishki oylarda tayyorlangan koʻchatlarni erta bahorda shu yerimizga koʻchirib oʻtqazib, parvarishlaymiz,—deydi jarqoqlik namunali tomorqachilardan Maʼruf Axtamov.—Qovun va tarvuzlarni urugʻdan koʻra koʻchat qilib ekish hosilning odatdagiga nisbatan 1-1,5 oy erta pishib yetilishiga xizmat qilmoqda. Bu esa oilamiz xonadoniga qoʻshimcha daromaddir.

Ishning koʻzini bilgan jarqoqlik dehqonlar har yili erta bahorda qovun va tarvuz koʻchatlarini plyonka ostida yetishtirib, dehqon xoʻjaliklariga yetkazib berishni odatga aylantirishgan. Masalan, shu mahallaning Shodlik koʻchasida yashovchi Maʼruf Axtamov hovlisidagi atigi 2 sotixli issiqxonasida 40 ming donaga yaqin qovunning “dakara” navi hamda tarvuz koʻchatlarini yetishtirib chiqargan. Bugunga kelib u bilan yaqin hamkorlikdagi xoʻjaliklarda sara koʻchat ekib parvarishlanmoqda.  

Bugun serquyosh choʻlquvarlar zaminining Boʻzachi mahallasida ham mehnatkash va halol, fidoyi dehqonlar peshona teri evaziga rizq undirib, el-yurt dasturxoni toʻkinligini taʼminlashda munosib hissasini qoʻshayotgan mirishkor xoʻjaliklar talaygina. Jumladan, Iqbol Hayitova, Bekzod Gʻafforov hamda Dilorom Sharopovalar oilalari yoshlarga ajratilgan yerdan samaralari foydalanib, hozirda bu dehqon xoʻjaliklarida ham qovun-tarvuz ekib yetishtirish harakatiga kirishilgan.    

Viloyat hokimligi matbuot xizmati