Buxoro viloyati hokimligi

Choʻlquvarlar tumanida ham garchi sanoati va qishloq xoʻjaligi rivojlanayotganiga qaramasdan, mahallalarda mehnat migrantlari, munosib ish oʻrniga ega boʻlmaganlar, kasb-hunar egallash payida boʻlgan yigit-qizlar ham oz emas. Bugun oʻz taqdiriga befarq boʻlmagan fuqaroga ish izlab uzoqqa borishiga hojat yoʻq. Negaki, mahallaning oʻzida daromadbop ish va imkoniyat yetarli. Hududda tomorqa madaniyati shakllanayotgani esa alohida mavzu. Hokim yordamchisi tavsiyanomasi asosida bugun tashvish va muammolariga yechim topib, daromadli ish bilan band fuqarolar safi kengaymoqda. 

Bu boradagi ishlarni tuman markazidan 15 kilometr uzoqlikdagi “Boʻzachi” mahalla fuqarolar yigʻini misolida ham koʻrish mumkin. Mazkur mahallaning Murotobod, Ahillik, Barhayot hamda Navbahor koʻchalarida bugunga kelib  790 ta xonadonda 3300 dan ortiq aholi vakili istiqomat qilmoqda. Tomorqa va ekin yeri mavjudligi, sugʻorishga qulayligi tufayli hudud aholisining aksariyat qismi dehqonchilik va chorvachilik bilan shugʻullanib, avvalo roʻzgʻori toʻkinligini taʼminlamoqda.  

Boʻzachilik aholi, tomorqa yer egalari ixtiyorida bugun 36 gektardan ziyod  xonadon ichidagi tomorqa hamda 72 gektar dala tomorqa yeri mavjud boʻlib, har yilgi dehqonchilik mavsumida bu yerlarda sabzavot-poliz mahsulotlari, dukkakli va boshqa mahsulotlar ekib yetishtirish salmogʻi oshmoqda. Ayni erta bahor mavsumida esa bu saʼy-harakat jonlanib, xonadonlarda ish qizgʻin tus olgan.  

Jumladan, Malohat Temirova, Hamid Rashidov, Qobil Safarov, Boboqul  Shamsiyev singari mirishkorlar ham oila aʼzolari koʻmagida tomorqalarini obod qilib, moʻl hosil olish harakatiga tushishgan. Qaysidir tomorqada allaqachon kartoshka ekib boʻlingan, yana kimdir yerni tayyorlab, agʻdarib ekinga tayyorlamoqda. Boshqa bir xoʻjalikda esa ekin yeri bilan birga ariqlarni tozalash, daraxtlarni oqlash ishlari avjida. Bunda kech kuzda “toʻqsonbosti” usulda sabzavot, koʻkatlar ekib, bugun hosilini saranjomlayotgan, qoʻshimda daromad topayotgan oilalar ham oz emas. 

Yana bir eʼtiborli holat, mahalla maʼmuriy idorasi oldida ham issiqxona barpo qilingan boʻlib, mazkur ekin yerida limon butalari va qulupnay koʻchatlari oʻtqazilib parvarishlab kelinadi. Qolaversa, mahallani obod qilish, chiroyiga chiroy qoʻshish maqsadida turfa gul koʻchatlari ham oʻstirib kelinmoqda. Bahor sep yoygani sari shu kunlarda boʻzachiliklar xonadonlari, koʻchalar atrofida manzarali va mevali daraxt koʻchatlarini oʻtqazish ishlariga ham eʼtirbor qaratilmoqda.  

Viloyat hokimligi matbuot xizmati