Buxoro viloyati hokimligi

— Issiqxona qurib, qishki mavsumda hosil yetishtirish tajribasini oʻrganib,  tomorqa xazina ekanini tushunib yetmoqdamiz,—deydi Chorbogʻkent qishlogʻida yashovchi mirishkorlardan biri Maqsud Oqilov. — Oila aʼzolarimiz bilan birga har biri 1 sotixdan, ikkita issiqxona barpo qilib, peshma-pesh hosil yetishtirayapmiz. Bugunga kelib bir sidra bodring hosilini yetishtirib, bundan 100 kilogram atrofida hosilni saranjomlagan boʻlsak, mavsum oxirigacha jami 300 kilogram hosil olishni koʻzlab turibmiz. Bu bilan har tupdan oʻrtacha 1-1,5 kilogramdan hosil olishga erishmoqdamiz. Qoʻlga kiritilayotgan daromad esa 8 million soʻmdan kam emas. 

Ayni paytda Oqilovlar oilasi tomorqadan yiliga ikki-uch marta hosil olmoqda. Asosan, pomidor, bodring, sarimsoqpiyoz, bulgʻor qalampiri almashlab ekilib, moʻl hosil saranjomlanmoqda. Hosildan boʻshagan yerga biroz “dam” berilib, mineral va mahalliy oʻgʻitga toʻyintirib, sugʻorib, ekin yeri tobiga yetganida ikkinchi hosilga kirishilmoqda. Albatta, bunda urugʻ, mineral oʻgʻit, biologik dorilash, isitish uchun issiqxona sarf–xarajatidan tashqari erishilayotgan foyda ham chakkimas.

—Yengil konstruksiyali issiqxona qurish uchun boshida moliyaviy jihatdan qiynalganmiz. Ammo oʻtgan yili tuman hokimligi koʻmagida “Har bir oila – tadbirkor” dasturi doirasida bankdan 10 million soʻm imtiyozli kredit sarmoyasini olib, issiqxonani barpo qildik,—deydi tomorqasida mehnat qilib huzurlanadigan Maqsud Oqilov.— Shukrki, mirishkor dehqonlar tajribasidan oʻrganib, bodring, pomidor va koʻkatlar ekib, yetishtirib, barakali hosil olmoqdamiz. Muhimi, yil boʻyi dasturxonimizda sarxil meva–sabzavot bor. Hovlimizda parvarishlayotgan 20 tupdan ortiq mevali daraxtimizdan har yili moʻl hosil olamiz.   

Qolaversa, qishki mavsumda bu xonadon issiqxonasida bir qarich yer boʻsh qoldirilmasdan, koʻkat, ismaloq, kashnich, shivit, rediska, sarimsoqpiyoz ekib tirikchilik qilinayotgani ham roʻzgʻor kam-koʻstini qoplamoqda.

Viloyat hokimligi matbuot xizmati