Buxoro viloyati hokimligi

Ayni kunda Kogon shahrida ham  9-sonli umumtaʼlim maktabi tomorqa yerida 2 sotixdan iborat issiqxona tashkil etilgan boʻlib, unda qishki mavsumda ham limon, apelsin kabi sitrus meva butalari niholi oʻtqazilib, parvarishlanmoqda. Qator orasida esa parvarishlangan bodring hosilidan bultur 10 million soʻm daromad olingan boʻlsa, bu sarmoya issiqxona kamchiliklarini tuzatish barobarida 5 million soʻm maktab kutubxonasi uchun 100 dona kitob va sinf xonasiga zamonaviy televizor xaridiga sarflangani ayni muddao. Bunda oʻquvchilar ustozlari koʻmagida maktab hovlisida 2 million soʻmga 150 tup mevali daraxt niholi bilan birga, 100 tup atirgul koʻchatini sotib olib oʻtqazibdilar.

— Shu kunlarda mehnat taʼlimi, botanika, biologiya fanlaridan tegishli amaliy mashgʻulotlar oʻquvchilarimizga issiqxonada oʻtkazilayotgani ham bejiz emas. Bunda oʻquvchilarimizning tomorqa mehnatiga boʻlgan qiziqishlari, kasb-hunar tanlashga boʻlgan ishtiyoqlari yanada oshmoqda,—deydi umumtaʼlim maktabi direktori Otabek Hamroyev.—Hozirda issiqxonada mahsulot yetishtirishni koʻpaytirish, maktab yerlariga mevali va manzarali daraxt nihollarini koʻproq oʻtqazib, hududni obodonlashtirish harakatidamiz.

Ayni kunda temiryoʻlchilar shahri mutasaddilari hududdagi 11 ta umumtaʼlim maktabining barchasida ana shunday ixcham, zamonaviy ham daromad keltiradigan issiqxonalar tashkil etish choralarini koʻrmoqda. 

Viloyat hokimligi matbuot xizmati