Mahalla maʼmuriyati, bevosita masʼul “yettilik” saʼy-harakati bilan oʻtgan yilda niyozhojiliklarning 320 nafari doimiy ish bilan taʼminlangan. Eʼtiborlisi, ularning aksariyati kam taʼminlangan, madadga muhtoj oilalar vakillari.     

— Har jabhada tashabbuskor, oʻylab yurgan ishini rivojlantirish ilinjida boʻlgan mahalladoshlarimizni moddiy qoʻllab-quvvatlash maqsadida 2024-yilda bizga umumiy qiymati 2,5 milliard soʻm miqdoridagi, uch yil muddatga 33 million soʻmgacha boʻlgan bank imtiyozli kredit sarmoyasi ajratilgandi,—deydi tuman hokimining “Niyozhoji” MFY dagi yordamchisi Baxtishod Husenov.—Birgina “Har bir oila—tadbirkor” davlat dasturi doirasida mahallamizga 1 milliard 200 million soʻm mablagʻ moliyalashtirilgan. Bu mablagʻ 54 nafar tashabbuskorga rasmiylashtirib berilgani natijasida turli jabhada kichik sex koʻrinishida loyihalar ishga tushirilib, asosiysi, 70 nafardan oshiq fuqaroga daromad manbai yaratilgani quvonarli, albatta.     
 
Jumladan, niyozhojilik Nigora Musayeva yaratib berilgan imkoniyatlardan oqilona foydalanayotganlardan. Tirikchilik vajidan oʻz xonadonida turli shirinliklar, qandolat mahsulotlari pishirib yurgan ayolga tavsiyanoma asosida 33 million soʻm imtiyozli kredit sarmoyasi ajratilgani uning alohida qandolat sexini ochishiga turtki boʻldi. 

Hozirda mahallada “Milliy shirinliklar” yorligʻi ostida  faoliyat boshlagan sex Nigora Musayevaniki boʻlib, bunda oʻnga yaqin xotin-qiz 15 turdagi qandolat mahsulotlari, tortlarni pishirib tayyorlab, buyurtmachi mijozlariga yetkazmoqda. Aytish joizki, shirinliklar tayyorlash bilan daromad topayotgan xotin-qizlarning aksari shu kungacha mahallaning "Ayollar daftari"dan oʻrin olganlardir. 

Umuman, mahalla maʼmuriyati yaqin koʻmagida imtiyozli sarmoyani muddatli kredit mablagʻi sifatida rasmiylashtirib olganlardan Anora Yoʻldosheva, Barchinoy Nasriddinovalar tikuvchilikda, Soniya Yoʻldosheva hamda Inoyat Ataullayevlar  chorvachilikda, Jamshid Toyirov “Akfa” sexi, Anvar Hamidov temirchilik ustaxonasini ochib, Surayyo Joʻrayeva uy xoʻjaligi uchun qoʻy-qoʻzi va farzandi nomiga motokultivator texnikasiga ega boʻlishib, daromad topishmoqda. Ishini rivojlantirayotganlar esa oʻzi bilan birga 3-4 kishini ham ishli qilishning uddasidan chiqishmoqda. Muhimi, shu tariqa zarur chora-tadbirlar tufayli mahallada mavjud muammolarga yechim topilib, kambagʻallik darajasi qisqartirilmoqda.       
       
Viloyat hokimligi matbuot xizmati