Kogon: Oʻba-choʻlida ham issiqxonachi mirishkorlar safi kengaymoqda
2025-01-14 16:10:00 / Yangiliklar
Tahlillardan koʻrinishicha, hozirda Kogon tumanida aholi tomorqachilari 20 ming 928 nafardan koʻproq boʻlib, ular tasarrufidagi mavjud tomorqa yeri 2 ming 128 gektarga yetkazilgan. Shuningdek, hududda bevosita issiqxona xoʻjaligini barpo etib, unda yilning toʻrt faslida ham barakali hosil yetishtirayotgan xoʻjaliklar ekin yeri 20 gektardan ortiq maydonni tashkil etmoqda. Mazkur issiqxonalarning aksariyati 1–4 sotixdan iborat boʻlib, 2023-yil mobaynida asosan pomidor, kartoshka, piyoz, bodring, karam, sarimsoqpiyoz, qolaversa, limon, apelsin kabi sitrus meva yetishtirilib, xalqimiz dasturxoniga tuhfa etilgan.
Yil boʻyi astoydil ekin yerida ishlab, kerak boʻlsa “yoʻqni yoʻndirib”, “qalovini topib, qorni yondirib”, pirovardida peshona teri evaziga barakali hosil yetishtirayotgan aholi xonadonlarida shu kunlarda plyonka ostida kartoshka, pomidor, piyoz, bulgʻor qalampiri, yana boshqa mahsulotlar yetishtirilayotganini koʻrish mumkin. Ular orasida limon, apelsin, mandarin kabi sitrus meva yetishtirishda ham puxta tajribaga egalari bor.
Oʻba-choʻli mahallasida istiqomat qiluvchi Munavvar Turobova ham ana shunday mehnatkash oila vakillaridan sanaladi. Xonadon egalari hovlidagi 15 sotix yerdan samarali foydalanib, yil boʻyi 3-marta hosil olishning uddasidan chiqishmoqda. Bunda moʻjazgina ekin yerida pomidor, bodring hamda koʻkatlar peshma-pesh yetishtiriladi. Nihoyasiga yetgan dehqonchilik yilida birgina oila ekin yeri va issiqxonasida uch marta yetishtirilgan sabzavot mahsulotidan 60 million soʻmga yetkazib moddiy manfaat koʻrgan boʻlsa, ayni qish kunlarida plyonka ostida oʻstirilgan ismaloq, kashnich, shivit kabi koʻkatlar oilaga qoʻshimcha daromad keltirmoqda. Roʻzgʻordan ortgan issiqxona hosili qoʻni-qoʻshni, mahalladoshlar dasturxoniga tortiq qilinmoqda.
Viloyat hokimligi matbuot xizmati