Buxoro viloyati hokimligi

Tumanda 10 ming gektar yerda sanoat uchun qimmatbaho paxta xom ashyosi yetishtirilayotgan boʻlsa, shundan ayni kunda bevosita paxtachilikda band boʻlgan 300 tadan ortiq fermer xoʻjaligi koʻzlangan “oq oltin” xirmonini barpo etib, moddiy manfaatdorligini oshirmoqda. Shartnomaga koʻra kech kuzda tuman paxtakorlari barpo qilgan “oq oltin” xirmoni salmogʻi 39 ming 800 tonnadan oshirilgani qayta ishlash va toʻqimachilik tarmogʻi rivojiga, xoʻjaliklar modiy manfaatdorligiga xizmat qilmoqda.

Hozirda tuman yoshlariga ajratilgan, umumiy maydoni 1415 gektar maydondagi dehqon xoʻjaligi va 100 gektardagi sabzavotchilikka ixtisoslashgan xoʻjaliklarda sabzavot-poliz mahsulotlari yetishtirilayotgani hisobidan xonadonlarda roʻzgʻor ehtiyoji qondirilmoqda. 

Har yilgi mavsumiy agrotexnik tadbirlarga muvofiq, tumanda gʻalla hosilidan boʻshatilgan yer maydoni 531 gektarida sabzi, 310 gektarida sabzavot-poliz mahsulotlari ekib yetishtiriladi. Xuddi shunday, makkajoʻxori doni uchun 1050 gektar, moyli ekinlar uchun 392 gektar, dukkakli mahsulotlar yetishtirishga 1000 gektar, qizil lavlagi yetishtirishga 220 gektar, tariq yetishtirishga 1200 gektar yer maydoni ajratilgan va dehqon xoʻjaliklari, tomorqachilar tomonidan amaliy ish boshlangan. 

Hududda bugʻdoy yetishtirilgan konturlarning jami 6 ming 199 gektar yer maydonida takroriy qishloq xoʻjaligi ekinlarini ekib parvarishlash, pirovardida elimiz dasturxoni toʻkinligi uchun ehtiyojga yarasha sabzavot-poliz mahsulotlari bilan birga 900 gektardan oshiq yerda chorva majmuasi uchun talab qilinayotgan zahira tayyorlanmoqda.  Shu kunlarda esa tumanda ham kech kuzda “toʻqsonbosti” usulida 2 ming 493 gektar maydonga ekib yetishtirilgan sabzavot hosilini saranjomlash jarayoni bormoqda. 

Endilikda Oʻzbekiston Respublikasi Prezidentining 2024-yil 30-dekabrdagi “Qishloq xoʻjaligi maydonlaridagi qoʻshimcha imkoniyatlardan foydalangan holda mahsulot yetishtirishni koʻpaytirishga doir chora-tadbirlar toʻgʻrisida”gi qaroriga muvofiq jumladan, viloyatimizda dala chetlari hamda aholi tomorqasi, xonadonlar va koʻp qavatli uylar oldi, mahallaning ichki koʻchalarida qishloq xoʻjaligi mahsulotlari yetishtirish tizimini takomillashtirish boʻyicha yangi tizim joriy qilinmoqda.

Kuni kecha tuman hokimligida mazkur PQ-465-sonli qaror mazmun-mohiyati va uning jumladan, Vobkent tumanidagi ijrosiga doir yigʻilish boʻlib oʻtdi. Unda hududdagi fermer xoʻjaligi rahbarlari, agrokompleksga tegishli mutasaddi tashkilot va idoralar rahbarlariga viloyat qishloq xoʻjaligi boshqarmasi boshligʻining birinchi oʻrinbosari Samandar  Ergashev, viloyat Oʻsimliklar karantini va himoyasi boshqarmasi boshligʻi Otabek Muxtorov, tuman hokimi oʻrinbosari Ozod Noʻkarovlar atroflicha tushuntirish va yoʻl-yoʻriq berdilar. 

Yuqoridagi qaror ijrosi yuzasidan “Amu-Buxoro” irrigatsiya tizimlari havza boshqarmasi, Agrosanoat majmui ustidan nazorat qilish inspeksiyasi viloyat boshqarmasi, Oʻsimliklar karantini va himoyasi boshqarmasi, viloyat Agrosanoatni rivojlantirish boshqarmasi, viloyat hokimligi qishloq xoʻjaligi boshqarmasi, fermer, dehqon xoʻjaliklari va tomorqa yer egalari viloyat kengashi, Agrosanoatni rivojlantirish va qoʻllab-quvvatlash davlat maqsadli jamgʻarmasi, viloyat markaziy banki va boshqa daxldor tashkilotlar zimmasiga qator aniq vazifalar yuklangan. 

Shuningdek, dala chetlari, kanallar, sugʻorish va kollektor-drenaj tarmoqlarining atroflaridagi maydonlarda, aholi tomorqasi, xonadonlar va koʻp qavatli uylar oldi hamda mahallaning ichki koʻchalarida qishloq xoʻjaligi mahsulotlari yetishtirilishini tashkil qilishni muvofiqlashtirish boʻyicha viloyat Ishchi guruhi tuzilgani maqsadga muvofiqdir.

Taʼkidlanganidek, xoʻjaliklarga ichki fitosanitariya sertifikati bir yil davomida bepul berilishi, dala chetlariga ekilgan “in-vitro” usulida yaratilgan mevali payvandtagli koʻchatlarni sotib olish xarajatlarining 50 foizi miqdorida, biroq har bir mevali payvandtagli koʻchatga 25 ming soʻmdan oshmagan holda Agrosanoatni rivojlantirish va qoʻllab-quvvatlash davlat maqsadli jamgʻarmasidan belgilangan tartibda subsidiya ajratilishi boʻyicha tushuntirishlar berildi.

Viloyat hokimligi matbuot xizmati