Olotda tuman mudofaa ishlari boʻlimi maʼmuriy binosi foydalanishga topshirildi
2025-01-08 20:10:00 / Yangiliklar
Tuman markazidagi “Bunyodkor” MFY da mudofaa ishlari boʻlimi maʼmuriy binosi mukammal taʼmirdan chiqarildi. Mazkur bino oʻtgan asr oltmishinchi yilarida qurilgan boʻlib, oʻtgan davrda bir necha bor rekonstruksiya qilingan, soʻngi yillarda butunlay taʼmirtalab koʻrinishga kelgandi. Shu bois, nihoyasiga yetgan yil yoz oylarida mazkur inshoot mukammal taʼmiri uchun 1 milliard soʻm mablagʻ moliyalashtirilib, pudratchi subyekt, Sunnatillo Madatov boshchiligidagi “Xumin universal stroy” MCHJ binokorlari tomonidan kapital rekonstruksiya ishlari olib borildi.
Bugunga kelib ikki qavatli zamonaviy qiyofadagi, talab darajasida jihozlangan oʻquv-mashgʻulot, navbatchilik, chaqiruv punkti va boshqa maʼmuriy xonalariga ega mudofaa ishlari boʻlimi binosi qayta chiroy ochdi. Bugun olis tumanda yosh avlodni harbiy vatanparvarlik ruhida tarbiyalashdek xayrli maqsadga xizmat qiladigan yangi inshootni foydalanishga topshirish tadbiri boʻlib oʻtdi. Unda harbiylar, viloyat mudofaa ishlari boshqarmasi, tuman hokimligi mutasaddilari, jamoatchilik vakillari hozir boʻldilar.
Tadbirda soʻzga chiqqan Janubiy-Gʻarbiy maxsus okrugi qoʻmondoni, general-mayor Farhod Shermatov, viloyat hokimining birinchi oʻrinbosari Botir Axmedov, nuroniylar vakili Saidquli Oqiyev va boshqalar barchani arafadagi 14-yanvar—Vatan himoyachilari kuni va shu munosabat bilan zamonaviy koʻrinish hosil qilgan inshoot bilan samimiy tabrikladilar. Bu maʼmuriy inshoot yurt koriga kamarbasta farzandlar, jonajon Vatanimiz mustaqilligi va hududiy yaxlitligini himoya qilishga qodir harbiylarni yetishtirib chiqarishga xizmat qiladigan vosita ekanligi taʼkidlandi.
Bundan tashqari, soʻz olganlar milliy armiyamiz kuch-qudrati, unda yaratilayotgan keng imkoniyatlar, yoshlarni barkamol ulgʻayishida olib borilayotgan islohotlar haqida toʻxtaldilar. Maʼlumot uchun, birgina yakuniga yetgan yilda tuman mudofaa ishlari boʻlimi tomonidan 135 nafar olotlik yigit muddatli va 350 nafar navqiron oʻgʻlon shartnoma asosida muqobil harbiy xizmatga chaqirilgan.
Viloyat hokimligi matbuot xizmati