Buxoro viloyati hokimligi

Tomorqa madaniyati, chorvachilik bilan birga parrandachilik rivojlanayotgan hududlardan biri “Niyozxoʻja" mahalla fuqarolar yigʻinidir. Masalan, Maqsuda Hojiyeva xonadoni astoydil tovuq boqish istagini bildirgani bois, mahalla tomonidan bu tashabbus qoʻllab-quvvatlanib, xonadon sohibiga 100 bosh tovuq olib berilgan edi. Oradan uch yil oʻtib, bu manzilda parvarishlanayotgan tovuq soni 500 boshga yetkazilgani quvonarli, albatta.

Serdaromad tarmoq oʻziga xos nozik yondashuvni taqozo etadi. Mirishkorlar mutaxassis-zooveterinarlar bilan maslahatlashib, parranda uchun zarur kundalik ozuqa ratsioni va emlashlariga eʼtibor qaratishgani shunday samara bermoqda. 

— Shaxsiy yordamchi, dehqon va fermer xoʻjaliklarida parranda boqish uchun  zarur  tavsiyalar ishlab chiqilgani bizga ham tayyor dastur vazifasini oʻtab, bu tajribaga tayanib kam boʻlmadik, – deydi xonadon sohibi Anvar Gadoyev. — Hozirda tovuqlarimizdan kuniga 450 donagacha tuxum olishga erishmoqdamiz. Buni moddiy hisob-kitob qilsak, kuniga qariyb 500 ming soʻm daromad degani. 

Uch yil mobaynida mazkur oilada uch aʼzosining bandligi taʼminlangan boʻlsa, ular moddiy manfaatdorligidan tashqari, qoʻlga kiritilayotgan daromad hisobidan  "Damas" avtomashinasi ham xarid qilingan. Shaksiz, bu natijaga oʻz-oʻzidan erishilmaydi. Parranda yetilishi va rivoji uchun bahor, yoz fasllari qulay muhit boʻlib, parvarishi puxta boʻlsa, kech kuzga borib tuxumga kiradi. Bungacha esa jonivorlarni turli kasalliklardan asrash uchun emlash, dezinfeksiyalash talab qilinadi. 

Albatta, zotdor tovuq sertuxum boʻladi. Mavjud imkoniyatdan foydalanib, Maqsuda Hojiyeva xonadonida ham kelgusida parrandani koʻpaytirib, oilaviy korxona mahsuldorligi va moddiy manfaatdorligini oshirish, qoʻshimcha ish oʻrinlarini yaratish choralari koʻrilmoqda. 

Viloyat hokimligi matbuot xizmati