Shofirkon: “Muhammadali” sport majmuasi foydalanishga topshirildi
2025-01-04 11:30:00 / Yangiliklar
Oʻsib-ulgʻayib kelayotgan barkamol oʻgʻil-qizni jismonan va ruhan chiniqtirish, sportga boʻlgan qiziqishlarini qoʻllab-quvvatlash, yoshlarni har jihatdan sogʻlom, maʼnaviy barkamol etib tarbiyalash maqsadida Shofirkon tumanida yana bir xayrli tashabbus amalga oshirildi.
Bir paytlar qishloq xoʻjaligi texnika parki sifatida foydalanib kelingan sobiq "Mashʼal" MTP binosi oʻrnida endilikda zamonaviy "Muhammadali" sport majmuasi barpo qilingani yosh sportsevarlar uchun koʻpdan kutilgan voqea boʻldi.
Ushbu loyiha uchun 400 million soʻm mablagʻ yoʻnaltirilib, 3 ming kvadrat metrni egallagan maydonda sport majmuasi bunyod etildi. Sport majmuasi Sharq yakkakurashlaridan aynan dzyu-do sport turi bilan shugʻullanuvchi yosh sportchilar uchun moʻljallangan boʻlib, bir paytning oʻzida 40 nafar yosh kurash bilan muntazam shugʻullanishi mumkin. Zalda qulay sharoitda mashgʻulot oʻtash uchun talabga javob beradigan yuvinish-kiyinish xonalari, dush va boshqa yordamchi xonalar mukammal taʼmirlangan va zarur inventarlar bilan jihozlangan.
Bunda yosh sportsevar kurashchilar tajribali murabbiy Xolmurod Rahmonov boshchiligida dzyu-do bilan astoydil shugʻullanishlari mumkin. Aytish joizki, shu kunga qadar murabbiyning shogirdlari bilan qoʻlga kiritib kelayotgan natitjalari ham eʼtirofga loyiq. Xususan, 2023-yilda uning shogirdlaridan Mironshoh Nasriddinov, Ashurbek Rajabboyev va boshqalar viloyat va hatto, respublika miqyosidagi musobaqalarda faxrli oʻrinlarni egallab, tuman sharafini munosib himoya qilib kelishmoqda.
Yangi yil bayrami kunlarida "Muhammadali" sport majmuasining foydalanishga topshirilgani sportchi yoshlar uchun munosib sovgʻa boʻldi. Ochilish marosimida tuman hokimligi mutasaddilari, faxriy sportchilar, mahalla faollari ishtirok etib, yosh sportchilarga muvaffaqiyatlar tilashdi. Ramziy alvon lenta qirqilgach, mehmonlar sport majmuasida yaratilgan shart-sharoit bilan tanishdilar. Eʼtirof qilinganidek, mazkur sport majmuasi yosh isteʼdodli sportchilar uchun yangi marralar sari yoʻl ochadi.
Viloyat hokimligi matbuot xizmati