Buxoro viloyati hokimligi

Jumladan, davlatimiz rahbarining 2023-yil 25-dekabrdagi “2024-2026-yillarda Oʻzbekiston Respublikasining ijtimoiy va ishlab chiqarish infratuzilmasini rivojlantirish chora-tadbirlari toʻgʻrisida”gi qaroriga asosan viloyatimizda ham qator ijtimoiy soha inshootlarida qurilish-taʼmirlash ishlari olib borilib, muassasalar moddiy-texnik imkoniyatlari yaxshilanmoqda. 

Qorakoʻl tumanidagi "Muruvvat" nogironligi boʻlgan erkaklar uchun internat uyida ham 244 oʻrinli mavjud bino-inshootlarini mukammal taʼmirlash va unda qoʻshimcha 156 oʻrinli bino qurish va jihozlash ishlari yuqoridagi qarorga muvofiq boshlangandi.   

Bunda viloyat hokimligi huzuridagi “Yagona buyurtmachi xizmati injeniring kompaniyasi” DUK buyurtmachiligida loyiha-smeta hujjatlari "BUXORO KOʻPRIK TRANS SERVIS" XK tashkiloti tomonidan ishlab chiqilgan. Investitsiya dasturi asosida mazkur loyiha uchun qiymati 34 milliard 742 million soʻm mablagʻ ajratilib, bu manzilda qurilish-taʼmirlash ishlari pudratchi “GIJDUVON GOVSHUN MAXSUS QURILISH MONTAJ” masʼuliyati cheklangan jamiyati tomonidan amalga oshirildi.  Quvonarlisi, eski muassasaning boʻsh yer maydonlaridan unumli foydalangan holda ikki qavatli 4 ta blok, bir  qavatli mehmon uyi, reabilitatsiya, sport zali, faollar zali va oshxona qurib bitkazilgani koʻpdan kutilgan yangilik boʻldi.

Xalqimizga xos mehr-shafqat va bagʻrikenglikning yorqin namunasi sifatida bugun olis tumanda "Muruvvat" nogironligi boʻlgan erkaklar uchun internat uyining yangi inshootini foydalanishga topshirish tadbiri boʻlib oʻtdi. Unda viloyat hokimi Botir Zaripov soʻzga chiqib, barchani Yangi yil ayyomi bilan samimiy muborakbod etar ekan, inson va uning hayoti, qadr-qimmati, erkinligi, shaʼni, boshqa daxlsiz huquqlari oliy qadriyat hisoblangan mamlakatimizda hech kim mehr va eʼtibordan chetda emasligini alohida eʼtirof etdi. 

Ayniqsa, yangi yil bayrami arafasida umrini benazir neʼmat bilib, hamisha yaxshilikka yuzlangan, sabr-matonat bilan oʻz maqsad va muddaolari yoʻlida intilib, shukronalik bilan yashayotgan yurtdoshlarimiz holidan xabar olish, ular turmush sharoitlarini yaxshilash xayrli va ezgu ish ekani taʼkidlandi. Zero, inson bu dunyoga, avvalo baxtli yashash uchun keladi, biroq, oʻz ezgu maqsadlarining roʻyobi uchun kurashib yashash, bor kuch va irodasi, tafakkurini ana shu maqsad yoʻlida safarbar etish, kuchli ijtimoiy masʼuliyat tuygʻusi bilan yashash har kimning ham qoʻlidan kelavermaydi. Shu maʼnoda, tafakkurni, botiniy kuch-qudratini ezgu yoʻlda sarflayotgan muruvvat uyi aʼzolari singari yengilmas iroda sohiblarining jasorat va matonati barchamiz uchun hamisha ibrat boʻlib qoladi. 

Shundan soʻng, muassasaning yangi inshooti ramziy lentasi qirqilgach, mehmonlar unda yaratilgan shart-sharoit bilan yaqindan tanishdilar. 

Viloyat hokimligi matbuot xizmati