Vobkent: Choʻrikalon qishlogʻi yoʻli asfaltlashtirilmoqda
2024-11-25 11:40:00 / Yangiliklar
Bugun “Yoʻl azobi — goʻr azobi” mazmunidagi maqollar eskirdi. Nega deganda, bu yoʻllarimizda avtotransport vositalari keskin oshgani, oʻtkazuvchanlik sifati yaxshilanayotgani bilan bogʻliq. Ammo, shunga yarasha yoʻl infratuzilmasi barcha hududda ham talabga muvofiq emasligi mahalla va qishloqlarda aholining haqli eʼtirozlariga sabab boʻlmoqda.
Bu oʻrinda birgina Vobkent tumani “Beshrabot” MFY da ham ichki yoʻllar ahvoli yuqoridagi fikrimizga dalil edi. Bu qishloqda yashovchi aholi talab va murojaatlaridan soʻng “Open budjet” loyihasi doirasida qishloq yoʻllarining 3,5 kilometrga teng qismi asfaltlashtirilgani koʻplarni mamnun qilmoqda.
Oʻz mahallasi obodonligi yoʻlida bir tanu bir jon boʻlib, yakdilligini namoyish etgan mahalla ahli "Tashabbusli byudjet" loyihasining ikkinchi mavsumi natijalariga koʻra 4173 ta ovoz toʻplab, gʻoliblikni qoʻlga kiritishgan. Endilikda ular tomonidan qishloq yoʻlining 3 kilometrdan oshiq qismi ravon koʻrinishga keltirilmoqda.
Joriy yilgi “Tashabbusli byudjet” jarayoniga toʻxtalsak, 2024-yil birinchi mavsumida umumiy qiymati 172 milliard 800 million soʻmga teng boʻlgan jami 216 ta loyiha moliyalashtirilgan boʻlib, mahalla va qishloqlarda manzilli ishlar jadal davom ettirilmoqda.
Umuman, shu yilning birinchi yarmi davrida tumanda umumiy qiymati 76 milliard soʻmlikka teng boʻlgan jami 68 ta loyiha roʻyobga chiqarilib, yangilangan obyektlar foydalanishga qabul qilingan. Bu haqdagi dalolatnomalar respublika “Open budjet” portaliga yuklangan. Bundan koʻrinadiki, oʻnlab qishloq xonadonlari va ularda yashayotgan aholi vakillari duch kelishayotgan tashvish-muammo, yaʼni yoʻl, elektr energiyasi, gaz, ichimlik suvi kabi taʼminotdagi nuqson va kamchiliklar bartaraf qilingan.
Bugunga kelib esa tumanning qator qishloqlarida ichki yoʻllar tuman yoʻllardan foydalanish davlat muassasasi hamda obodonlashtirish boshqarmasi ishchi-mutaxassislari tomonidan shagʻallashtirilib, asfalt yotqizilmoqda. Bu amaliy ishni oʻz zimmasiga olib, yoʻl solishda jonbozlik koʻrsatayotgan tuman yoʻllardan foydalanish davlat muassasasi ishchi-mutaxassislari ish sifatiga alohida eʼtibor qaratishmoqda.
Viloyat hokimligi matbuot xizmati