Buxoro viloyati hokimligi

Shuningdek, Prezidentimizning joriy yil 23-iyul kuni qabul qilingan “Zargarlik buyumlarini ishlab chiqarish sohasini yanada rivojlantirish va uning raqobatbardoshligini taʼminlash chora-tadbirlari toʻgʻrisida”gi Farmoniga asosan 2024-2026-yillarda “Oʻzmilliybank” AJ ishtirokida Buxoro va Namangan viloyatlarida bittadan hamda Toshkent shahrida ikkita zargarlik markazlarini tashkil etish belgilangan.  

Shunga koʻra, rivojlangan, eksportyor zargarlik sanoati korxonalarini Buxoroga jalb etish, investitsion loyihalarni amalga oshirish hamda mahalliy ishlab chiqaruvchilar bilan samarador tajriba almashishni joriy etish boʻyicha amaliy saʼy-harakatlarga jadal kirishildi. Bu borada katta tajribaga ega Turkiya kompaniyalari bilan faol muloqot olib borildi.  

Shunga koʻra, “Oʻzmilliybank” AJning “NBU INVEST GROUP” AJ kompaniyasi tomonidan Turkiyaning “PALA GOLDEN JEWELLERY” kompaniyasi bilan Buxoro shahrida zamonaviy zargarlik markazini tashkil qilish boʻyicha hamkorlik bitimi imzolandi.

Maʼlumot uchun: “PALA GOLDEN JEWELLERY” kompaniyasi zargarlik yoʻnalishida 25 yillik tajribaga ega boʻlgan tadbirkor Ufuk Pala tomonidan tashkil etilgan boʻlib, zargarlik buyumlari bilan birga ilgʻor texnologik uskunalar ishlab chiqarishga ixtisoslashgan. Kompaniyaning Birlashgan Arab Amirliklari, Misr, Marokash kabi davlatlarda sotuv ofislari mavjud va hozirda faoliyat geografiyasini yanada kengaytirib bormoqda.

Bugun, 21-noyabr kuni viloyat hokimi Botir Zaripovning Turkiyaning yetakchi zargarlik ishlab chiqaruvchilaridan biri hisoblangan “PALA GOLDEN JEWELLERY”   sanoat korxonasi rahbari Ufuk Pala va “Oʻzbekzargarsanoati" uyushmasi raisi Shoxrux Toʻychiboyev, shuningdek, “Oʻzmilliybank” AJ mutasaddilari ishtirokida kechgan uchrashuvda Buxoro shahrida tashkil etiladigan markaz faoliyati bilan bogʻliq  masalalar muhokamalar markazida boʻldi.

Qayd etilishicha, Savdo sanoat palatasi, "Oʻzbekzargarsanoati" uyushmasi, “Oʻzmilliybank” AJ hamkorligida tashkil etiladigan markazda yillik quvvati 300 kilogrammga teng zargarlik buyumlari ishlab chiqariladi. Ushbu markazda, oltin zaxira ombori, "shou-rum" va ishlab chiqarish maydonlari, asillik darajasini aniqlash laboratoriyalari hamda zargarlik yoʻnalishida mutaxassislarni dual taʼlim shaklida tayyorlovchi oʻquv kurslarini tashkil qilish va majmuani 2025-yil 1-choragida ishga tushirish koʻzda tutilmoqda.

Markazga turkiyalik tajribali mutaxassislar jalb qilinishi bilan bir qatorda mahalliy yoshlar uchun ham ish oʻrinlari yaratiladi. Shuningdek, mamlakatimizdagi zargarlik yoʻnalishiga ixtisoslashgan oʻquv dargohlari talabalari bevosita ushbu zargarlik markazida hamda “Pala Golden” kompaniyasining xorijdagi korxonalarida oʻz bilim va malakalarini oshirib boradilar. 

Muloqot davomida bu borada istiqbolda amalda oshiriladigan ishlar yuzasidan kelishib olindi. 

Viloyat hokimligi matbuot xizmati