Jondor: hokim yordamchisi grant sohibi sifatida tikuv sexini ochdi
2024-11-20 12:00:00 / Yangiliklar
Hokim yordamchisi hozirda 70 million soʻm miqdoridagi grant sarmoyasi hisobiga mahallada 4 ta tikuvchilik mashinkasi “overlo” uskunasi bilan oʻquv maskanini tashkil qilib, loyiha doirasida mahallada kam taʼminlangan xonadonlardan mehnatga layoqatli 20 nafar xotin-qizni kasb-hunarli qilib, ularni tadbirkorlik asosida daromadli qilishga oʻzining munosib hissasini qoʻshmoqda. Tikuvchilik faoliyatini puxta oʻrganib, sekin-asta buyurtmalarni bejirim tikib berishga oʻtayotgan chevarlar mehnatiga yarasha moddiy manfaat koʻrishadi.
Tahlillardan koʻrinishicha, tumanda yoshlar soni 33 mingdan oshgan boʻlib, ulardan rasmiy band boʻlgan yoshlar 17 mingdan ortiqni, norasmiy sektorda band boʻlgan yoshlar esa 11 mingga yaqinni tashkil etmoqda.
Alohida toifalangan daftarlar, masalan “Yoshlar daftari”da oʻtgan yili 2 400 dan ortiq yosh qayd qilinib, ularning bandligini taʼminlash boʻyicha tizimli ishlar amalga oshirib kelinmoqda. Albatta, mahallada alohida mavqei va vakolatiga ega hokim yordamchisi hamda yoshlar yetakchisi islohotlarning faol ishtirokchilari sifatida zamon bilan hamnafas boʻlishlari, bilim va mahoratlarini doimiy ravishda oshirib borib, hududda ishsizlik va qashshoqlikni kamaytirishga yordam berishlari ijtimoiy va boshqa muammolarni hal qilishi juda muhim. Ayni shu jihatdan Umid Xolovning Qazoqon mahallasida amalga oshirayotgan ishlari eʼtirofga munosibdir.
Viloyat hokimligi matbuot xizmati